யான் தொந்த𑌼ாரி, ஆள்க𑌼ெ𑌼 பாட𑌼ெ𑌼 பட𑌼ெ𑌼க𑌼ெ𑌼.

5. யான் தொந்த𑌼ாரி, ஆள்க𑌼ெ𑌼 பாட𑌼ெ𑌼 பட𑌼ெ𑌼க𑌼ெ𑌼.

யங் மெ𑌼த்திர்க்க என்ட𑌼ெ𑌼 யானி ப𑌼ன்ட𑌼ொட்டெ𑌼த𑌼ெ𑌼. மாக𑌼ாலெ𑌼 ஆப்பெ𑌼ன் யங் குப்பெ𑌼லா தக்காயெ𑌼 மங்க𑌼ாயெ𑌼 ஒட்டய ஆப்பெ𑌼த𑌼ெ𑌼. பின கத𑌼்த𑌼ெ𑌼லா ப𑌼ாளி ஆங்க𑌼ுன இசிரி நட்னிப்பெ𑌼க𑌼ெ𑌼. ஆ சமித்தெ𑌼ல் எ𑌼ட𑌼்லுஙா யானி ப𑌼ுப்பெ𑌼தெ𑌼. யானி ப𑌼ாட்டு குப்பெ𑌼ளா இப்பெ𑌼 தக்காயெ𑌼, மாங்க𑌼ாயெ𑌼 ஆங்க𑌼ுன பர்ச்செ𑌼னு திம்ப𑌼ெ𑌼த𑌼ெ𑌼. அன் மெ𑌼த்திர்ல் இப்பெ𑌼 மன்செ𑌼ன்ட𑌼ெ𑌼 தாம்ப𑌼ெ𑌼ர்த்தெ𑌼ல் அர்த𑌼்த𑌼ுனு எ𑌼ச்செ𑌼 மாய்ட𑌼்னு மன்செ𑌼ன்ட𑌼ெ𑌼 யானிய ஐட்டொட்டெ𑌼க𑌼ெ𑌼. அன் யானி குப்பெ𑌼ல் இத𑌼ுனு கத𑌼்க்க போப்பெ𑌼 மார்க𑌼ெ𑌼ளா போப்பெ𑌼த𑌼ெ𑌼. பெ𑌼ய்ட்டு கத𑌼்த𑌼ெ𑌼ல் ப𑌼ாள் நட்னிப்பெ𑌼 ஜாக்‌க உல்ஜுனு யான் போப்பெ𑌼த𑌼ெ𑌼. யானி பெ𑌼ய்ட்டு கத𑌼்த𑌼ெ𑌼ல் பட𑌼ெ𑌼 ப𑌼ாலிய ஒட்டய ஒட𑌼்சாட்டு முட்னு தொல்சாட்டு ஆ ப𑌼ாள்க𑌼ெ𑌼ட𑌼்ன தின்ட𑌼ாட்டு ஆ ஜக𑌼ெ𑌼ல் இப்பெ𑌼த𑌼ெ𑌼. அன் மன்செ𑌼ன்ட𑌼ெ𑌼 ஆ ஜாக்க பெ𑌼ய்ட்டு யானிய அட்டெ𑌼க𑌼ெ𑌼. அன் யானி கத𑌼்த𑌼ெ𑌼ல் இத𑌼ுனு பின போப்பெ𑌼த𑌼ெ𑌼. ஈங்தன்ன ஒன்டெ𑌼 ஒன்ட𑌼ெ𑌼 யானி எ𑌼ட𑌼்லுஙா நேர்தொட𑌼ய ப𑌼ணமா. ப𑌼ாட்டு ஒன் கீர்ல் மிந்த𑌼ெ𑌼ல் இத𑌼ெ𑌼 த்யாங்க𑌼ாய் ம்யரிய ஒட𑌼்சத𑌼்த𑌼ெ𑌼. அன் ஆ த்யாங்க𑌼ாய் ம்யரி பட்டெ𑌼 கீர்ல் ப𑌼ுத𑌼்த𑌼ுனு கீர்ல் இத𑌼ெ𑌼 சீட்டெ𑌼 ஒட𑌼்ஜெ𑌼செ𑌼த𑌼ெ𑌼. பின யானி ஆ ஜாக𑌼ெ𑌼ல் இத𑌼ுனு குப்க்க பே𑌼செ𑌼த𑌼ெ𑌼. பெ𑌼ய்ட்டு மாங்க𑌼ாயெ𑌼 தக்காயெ𑌼 ஒட்டய தின்ட𑌼ெ𑌼த𑌼ெ𑌼. அன்ட𑌼ெ𑌼 எ𑌼ட𑌼்லுஙா த𑌼ப்பு மளி பெ𑌼ஜ்ஜெ𑌼த𑌼ெ𑌼. அன் மளி பெ𑌼ஜ்ஜெ𑌼ஙா பொரிமி த𑌼ாரெ𑌼 யானி அட்ளாயெ𑌼 பே𑌼செ𑌼லு. நர்குருஙா மளி கெ𑌼ம்மி ஆசெ𑌼ஙா அன் மன்செ𑌼ன்ட𑌼ெ𑌼 ஒட்டயாளு யானிய அட்ளாயெ𑌼 பே𑌼செ𑌼க𑌼ெ𑌼. மன்செ𑌼ன்ட𑌼ெ𑌼 யானிய நே𑌼ய்ராட்டு யானிய அட்டெ𑌼செ𑌼ஙா, யானி ஈட்டு மன்செ𑌼ன்ட𑌼ெ𑌼ட𑌼்ன அட்டெ𑌼செ𑌼த𑌼ெ𑌼. அன் மன்செ𑌼ன்ட𑌼ெ𑌼 ஒட்டயாளு ஓட𑌼்செ𑌼க𑌼ெ𑌼. பின யானி எ𑌼ட𑌼்லுஙா கத𑌼்த𑌼ெ𑌼ல் இத𑌼ெ𑌼 ப𑌼ாளிய ஒட்செ𑌼னு தின்ட𑌼ெ𑌼த𑌼ெ𑌼. எ𑌼ட𑌼்லுஙா யானி கத𑌼்த𑌼ெ𑌼ல் தன்ன இத𑌼்த𑌼ெ𑌼. பின நாட𑌼ெ𑌼 எ𑌼த𑌼்த𑌼ுத𑌼ெ𑌼. நாட𑌼ெ𑌼 எ𑌼த𑌼்த𑌼ெ𑌼ஙா தனு யானி கத𑌼்த𑌼ெ𑌼லித𑌼ெ𑌼னு மார்க்க ப𑌼ன்ட𑌼ெ𑌼த𑌼ெ𑌼. ஆ யானி ப𑌼ன்ட𑌼ீட்டு தாள் ப𑌼ுத𑌼ெ𑌼செ𑌼த𑌼ெ𑌼. யானி தாள் ப𑌼ுத𑌼்த𑌼ெ𑌼ஙா ஆ யான்க்க ஏ𑌼ள்லாயெ𑌼 ஆசெ𑌼லா. அன் மெ𑌼த்திர்ல் இப்பெ𑌼 மன்செ𑌼ன்ட𑌼ெ𑌼 பாரெட்டொட𑌼ெ𑌼த்தெ𑌼ர்க்க யார்த்தெ𑌼க𑌼ெ𑌼. அன் பாரெ𑌼ட்டொட𑌼ெ𑌼க𑌼ெ𑌼 யானிய குய்ட்னு போக𑌼ெ𑌼ல் ஒன் ப𑌼ெ𑌼ன்ட𑌼ி எ𑌼ட்னு பாரெ𑌼ட்டொட𑌼ெ𑌼க𑌼ெ𑌼 மெ𑌼த்திர்க்க ப𑌼ன்ட𑌼ெ𑌼க𑌼ெ𑌼. பாரெ𑌼ட்டொட𑌼ெ𑌼க𑌼ெ𑌼 ப𑌼ாட்டு யான்க்க ஜூஜி குத்தெ𑌼செ𑌼க𑌼ெ𑌼. அன் யானி தல்த𑌼ெ𑌼ர்ஜெ𑌼னு தாள் ப𑌼ுத𑌼ே𑌼செ𑌼த𑌼ெ𑌼. அன் யான் ப𑌼ென்த்தெ𑌼ல் கால் ஒட்டய கய்ன்னொட𑌼 கய்ட்னு யானிய எ𑌼த𑌼ெ𑌼ட்னு ப𑌼ெ𑌼ன்ல் ப𑌼ாட𑌼்செ𑌼செ𑌼க𑌼ெ𑌼. பின யானிய குய்ட்னு பாரெ𑌼ட்டொட𑌼ெ𑌼க𑌼ெ𑌼 பே𑌼செ𑌼க𑌼ெ𑌼. பாரெ𑌼ட்டொட𑌼ெ𑌼க𑌼ெ𑌼 யானிய குய்ட்னு அர்த𑌼்த𑌼ெ𑌼 ப𑌼ட்க்க போப்பெ𑌼ன் ஆ யானி செ𑌼த்தே𑌼செ𑌼த𑌼ெ𑌼. அன் பாரெ𑌼ட்டொட𑌼ெ𑌼க𑌼ெ𑌼 ஆ யானிய ஒன் பாரெ𑌼ட் ஜாக்க குய்ட்னு பே𑌼செ𑌼க𑌼ெ𑌼. பின ஆ ஜாக𑌼ெ𑌼ல் ஒன் த𑌼ப்பு குலியெ𑌼 பாரெ𑌼ட்டொட𑌼ெ𑌼க𑌼ெ𑌼 எர்ஜெ𑌼க𑌼ெ𑌼. பின பாரெ𑌼ட்டொட𑌼ெ𑌼க𑌼ெ𑌼 குய்லியெ𑌼 எர்ஜாட்டு யானிய குய்லுட்டாட்டு பாரெ𑌼ட்டொட𑌼ெ𑌼க𑌼ெ𑌼 பே𑌼செ𑌼க𑌼ெ𑌼.