த்யாரி காக்கி எ𑌼ட𑌼்ட𑌼ாளு என்ட𑌼ெ𑌼 நோட்சனி எ𑌼ட𑌼்ட𑌼ாளு ஒன்ட𑌼ய தன்ன இப்பெ𑌼க𑌼ெ𑌼. குய்ரியெ𑌼 ஜாத்தார்க்க பே𑌼செ𑌼னி எ𑌼ட𑌼்ட𑌼ாளு ஒன்ட𑌼ய தன்ன போப்பெ𑌼க𑌼ெ𑌼. தங் மக்கெ𑌼ர்ன்ன கிக்கெ𑌼ல் கெம்சாட்டு இக𑌼ெ𑌼 எ𑌼ட𑌼்ட𑌼ாளு பெ𑌼ய்யொட்டெ𑌼க𑌼ெ𑌼. ஆங்க𑌼ி ஒன்டெ𑌼 க𑌼ுய்ரியெ𑌼 ஜாத்தாரி ஆசெ𑌼த𑌼ெ𑌼. அன் த்யாரி ஈட்டு காக்காக்கெ𑌼னோட𑌼ா காக்கக்கா காக்கக்கா இன்ட𑌼ெ𑌼 க𑌼ுய்ரியெ𑌼 ஜாத்தார்க்க மக்கெ𑌼ர்ன்ன குய்ட்னு போக𑌼ா எ𑌼ன்ட𑌼ெ𑌼த𑌼ெ𑌼. அன் காக்கக்கெ𑌼ன் ப𑌼ாட𑌼மா, நங்க𑌼ெ𑌼 எ𑌼ட𑌼்ட𑌼ாளு பெ𑌼ய்ட்டு க𑌼ுய்ரித்தெ𑌼ல் நிச்செ𑌼 தின்ட𑌼ாட்டு நங் மக்கெ𑌼ர்க்க எ𑌼ட்னு ப𑌼ார்கி எ𑌼ன்ட𑌼ெ𑌼த𑌼ெ𑌼. அன் சிரிமி எ𑌼ன்ட𑌼ாட்டு த்யாரி தன் மக𑌼்க𑌼ி தன் கீர்ல் ப𑌼ுட்டாட்டு பே𑌼செ𑌼த𑌼ெ𑌼.
த்யாராக்கெ𑌼ன் ஜாத்தார்க்க பே𑌼செ𑌼த𑌼ெ𑌼. அன் காக்காக்கெ𑌼ன் தன் மக𑌼்க𑌼ிய குய்ட்னு ஜாத்தார்க்க பே𑌼செ𑌼த𑌼ெ𑌼. அன் த்யாராக்கெ𑌼ன் காக்கி மக𑌼்க𑌼ியா குய்ட்னு பெ𑌼ய்னித𑌼ெ𑌼னா நெ𑌼ய்ராட்டு, த்யாராக்கெ𑌼ன் காக்காக்கெ𑌼னோட𑌼 நிய்யலா பெ𑌼த𑌼்த𑌼ெ𑌼, மக்கெ𑌼ர்ன்ன கிக்கி கெம்சாட்டு போக்கி எ𑌼ன்ட𑌼ெ𑌼த𑌼ெ𑌼, நிய்யெ𑌼 ஆங்க𑌼ி பெ𑌼த𑌼ெ𑌼ஙமா நவெ𑌼 யன் மக𑌼்க𑌼ிய கிக்கெ𑌼ல் கெம்சாட்டு ப𑌼ன்ட𑌼ெ𑌼த𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் காக்காக்கெ𑌼ன் நின் மாக்க ஐன்ட𑌼ிலமா, அத𑌼ெ𑌼 அல்லி இப்பெ𑌼 அன்பெ𑌼னு பெ𑌼த𑌼்த𑌼ெ𑌼. அன் த்யாராக்கெ𑌼ன் நினியா நவெ𑌼 கிஜெ𑌼னு தப்பெ𑌼னி எ𑌼ன்ட𑌼ாட்டு, தன் மன்செ𑌼ல் ப𑌼க𑌼்க𑌼ியா ந்யன்த்தெ𑌼னு த்யாராக்கெ𑌼ன் கீர்க்க பே𑌼செ𑌼த𑌼ெ𑌼.
அன் த்யாராக்கெ𑌼ன் கீர்க்க பெ𑌼ய்ட்டு நோட𑌼்ன், த்யாரி மக𑌼்க𑌼ிய பாம்ப𑌼ெ𑌼 புட𑌼்செ𑌼னு எ𑌼ட்ன் பெ𑌼ய்னித𑌼்த𑌼ெ𑌼. அன் த்யாராக்கெ𑌼ன் நிய்ராட்டு பய்ய இத𑌼்த𑌼ெ𑌼. பின ஒன்டெ𑌼 க்யாட்டெ𑌼 மளி பெ𑌼ஜ்ஜெ𑌼த𑌼ெ𑌼. அன் காக்கக்கெ𑌼ன் கீரி தூத் கீரி தனு. அன் காக்கக்கெ𑌼ன் கீரி சிராய நெந்த𑌼ெ𑌼த𑌼ெ𑌼. அன் காக்கக்கெ𑌼ன் த்யாராக்கெ𑌼னா யார்த்தெ𑌼னு யன் கீரி நெந்த𑌼ொட𑌼மா நவெ𑌼 மக்கெ𑌼ர்ன்ன குய்ட்னு நின் கீர்க்க ப𑌼ுப்பியா எ𑌼ன்ட𑌼ெ𑌼த𑌼ெ𑌼. அன் த்யாராக்கெ𑌼ன் சிரிமி ஒட்ரோ எ𑌼ன்ட𑌼ெ𑌼த𑌼ெ𑌼. பின காக்கக்கெ𑌼ன் த்யாராக்கெ𑌼ன்ட𑌼ெ𑌼 கீர்க்க போக𑌼ுனு, த்யாராக்கெ𑌼ன் நீரெ𑌼 குர்க𑌼ெ𑌼சாட்டு ஆ நீரல், மக்கப்பெ𑌼ய்ரியா கெல்க்கெ𑌼னு கத𑌼்த𑌼ெ𑌼. பின காக்கக்கெ𑌼ன் த்யாராக்கெ𑌼ன் கீர்க்க பெ𑌼ய்ட்டு ப𑌼ஙானியா தட்டெ𑌼செ𑌼த𑌼ெ𑌼. அன் த்யாராக்கெ𑌼ன் ப𑌼ாஙானி தர்த𑌼ுட்டெ𑌼த𑌼ெ𑌼. அன் காக்கக்கெ𑌼ன் தன் மக𑌼்க𑌼ியா குய்ட்னு கீர்க்க பே𑌼செ𑌼த𑌼ெ𑌼.
அன் த்யாராக்கெ𑌼ன் காக்கோட𑌼 நிய்யெ𑌼 நெந்த𑌼ெ𑌼னு ப𑌼ன்னட𑌼ெ𑌼த𑌼லா, நவெ𑌼 நின்க்க நீரெ𑌼 காசெ𑌼னு எ𑌼ட்செ𑌼னட𑌼்னி, நிய்யெ𑌼 பெ𑌼ய்ட்டு நீரெ𑌼 ஆய்ட𑌼்னு ஒன்ட𑌼ய கூட்சக𑌼ை எ𑌼ன்ட𑌼ெ𑌼த𑌼ெ𑌼. . அன் காக்கக்கெ𑌼ன் நிய்யெ𑌼 நீரெ𑌼 காசெ𑌼னட𑌼ெ𑌼த𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் த்யாராக்கெ𑌼ன் காசெ𑌼னட𑌼்னி எ𑌼ன்ட𑌼ெ𑌼த𑌼ெ𑌼. பின த்யாராக்கெ𑌼ன் நீரெ𑌼 ப𑌼ெர்ஜெ𑌼னு கொட்டாட்டு காக்கக்கெ𑌼னோட𑌼 நீரியா எ𑌼ட்ன்னு மண்ல் சோப்பெ𑌼 இத𑌼்த𑌼ாட்டு நீரெ𑌼 ப𑌼ேக்கக𑌼ை எ𑌼ன்ட𑌼ெ𑌼த𑌼ெ𑌼. அன் காக்கக்கெ𑌼ன் மண்ல் சோப்பெ𑌼 இத𑌼்த𑌼ாட்டு நீரெ𑌼 எ𑌼ட்னு ப𑌼ாக்கெ𑌼செ𑌼த𑌼ெ𑌼. அன் காக்கி பொட்த்தி பொட்த்தி ஈட்டு செ𑌼த்தே𑌼னெ𑌼செ𑌼த𑌼ெ𑌼. அன் த்யாராக்கெ𑌼ன் நினிந்த𑌼மா யன் மக𑌼்க𑌼ி செ𑌼த்தெ𑌼னே𑌼செ𑌼த𑌼ெ𑌼, இன நிய்யெ𑌼 செ𑌼த்தெ𑌼னோக𑌼ோ எ𑌼ன்ட𑌼ெ𑌼த𑌼ெ𑌼.
