ஒன்ட𑌼ெ𑌼 ஈர்ல் இலி மாமெ𑌼ன் சூன் மாமெ𑌼ன் எ𑌼ட𑌼்ட𑌼ாளு இத𑌼ெ𑌼க𑌼ெ𑌼. இக𑌼ெ𑌼 எட𑌼்ட𑌼ாளு என்ட𑌼ெ𑌼 குப்பெ𑌼லா பெர்கெ𑌼ன் தின்னு நட𑌼்த𑌼்த𑌼ொட்டெ𑌼க𑌼ெ𑌼. ஆங்க𑌼ி ஒன்டெ𑌼 குப்பெ𑌼ல் பெர்க்கெ𑌼ன் போப்பெ𑌼ன் இலி மாமெ𑌼ஙா ஒன்ட𑌼ெ𑌼 கும்ப𑌼ால் ப𑌼ிச்செ𑌼 கெ𑌼ட்செ𑌼த𑌼ெ𑌼. அன் இலி மாமெ𑌼ன் சூன் மாமெ𑌼னோட𑌼ா, சூன் மாமா யன்க்க கும்ப𑌼ால் ப𑌼ிச்செ𑌼 கெ𑌼ட்சி எ𑌼ன்ட𑌼ெ𑌼த𑌼ெ𑌼. அன் சூன் மாமெ𑌼ன் இலி மாமெ𑌼னோட𑌼 அன் நங்க𑌼ெ𑌼 ஈ கும்ப𑌼ால் ப𑌼ிச்சிய நட𑌼ிக்கி எ𑌼ன்ட𑌼ாட்டு, தங் கீர்க்க எ𑌼ட்ன் பெ𑌼ய்ட்டு குப்பெ𑌼ல் இக𑌼ெ𑌼 நட்டெ𑌼க𑌼ெ𑌼.
நட்டாட்டு இக𑌼ெ𑌼 எ𑌼ட𑌼்ட𑌼ாளு ஆ கும்ப𑌼ால் ப𑌼ிச்சிய மொளாக𑌼ோ மொளாக𑌼ோ எ𑌼ணெ𑌼ஙா, மொளா ஆசெ𑌼த𑌼ெ𑌼. பின கெ𑌼ய்ரியெ𑌼 ஆக𑌼ோ கெ𑌼ய்ரியெ𑌼 ஆக𑌼ோ எ𑌼ணெ𑌼ஙா, அன் கெ𑌼ய்ரியெ𑌼 ஆசெ𑌼த𑌼ெ𑌼. பின பூக𑌼ெ𑌼 ஆக𑌼ோ பூக𑌼ெ𑌼 ஆக𑌼ோ எ𑌼ணெ𑌼ஙா பூக𑌼ெ𑌼 ஆசெ𑌼த𑌼ெ𑌼. பின முய்ரியெ𑌼 ஆக𑌼ோ முய்ரியெ𑌼 ஆக𑌼ோ எ𑌼ணெ𑌼ஙா முய்ரியெ𑌼 ஆசெ𑌼த𑌼ெ𑌼. அன் பண்ணெ𑌼 ஆக𑌼ோ பண்ணெ𑌼 ஆக𑌼ோ எ𑌼ணெ𑌼ஙா பண்ணெ𑌼 ஆசெ𑌼த𑌼ெ𑌼. அன் இக𑌼ெ𑌼 எ𑌼ட𑌼்ட𑌼ாளு ஆ பண்ணிய பட்செ𑌼னு கய்ன்ட𑌼ுடுக𑌼ெ𑌼. கய்ன்ட𑌼ுடட்டு அட𑌼்லாயெ𑌼 நோட𑌼்ன் திச்செ𑌼 இலா. அன் இலி மாமெ𑌼ன் சூன் மாமெ𑌼னோட𑌼 ப𑌼ிர்க்கெ𑌼ல் கீர்ல் திச்செ𑌼 ப𑌼ே𑌼ட𑌼்னு ப𑌼ுக்க பெ𑌼த𑌼்த𑌼ெ𑌼. அன் சூன் மாமெ𑌼ன் திச்செ𑌼 ப𑌼ே𑌼ட𑌼்ல் பே𑌼செ𑌼த𑌼ெ𑌼.
அன் ப𑌼ிர்க்கெ𑌼ல் கீர்ல் இப்பெ𑌼க𑌼ெ𑌼 ஆ கீர்ல் இப்பெ𑌼 மாக்க நிச்செ𑌼 தீட்டித𑌼ெ𑌼க𑌼ெ𑌼. அன் சூன் மாமெ𑌼ன் மக𑌼்க𑌼ி நிச்சியா நெ𑌼ய்ராய்டு மக𑌼்க𑌼ி நிச்செ𑌼க்க காத்தி கூட்னித𑌼்த𑌼ெ𑌼. அன் இலி மாமெ𑌼ன் சூன் மாமெ𑌼னா யார்த்தெ𑌼னு திச்செ𑌼 எ𑌼ட்ன் ப𑌼ா எ𑌼ன்ட𑌼ெ𑌼த𑌼ெ𑌼. அன் சூன் மாமெ𑌼ன் இன்தன்னமா திச்செ𑌼 புய்ர்பெ𑌼சொட𑌼ெ𑌼க𑌼ெ𑌼 எ𑌼ன்ட𑌼ெ𑌼த𑌼ெ𑌼. பின ஒன்ட𑌼ீட்டு இலி மாமெ𑌼ன் சூன் மாமெ𑌼னோட𑌼 திச்செ𑌼 எ𑌼ட்ன் ப𑌼ா எ𑌼ன்ட𑌼ெத𑌼ெ𑌼. அன் சூன் மாமெ𑌼ன் இன்தன்னமா கெ𑌼ன்ட𑌼ெ𑌼 ஐயொட𑌼ெ𑌼த𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் இலி மாமெ𑌼ன் சூன் மாமெ𑌼னா தரேத்தெ𑌼னு ப𑌼ிர்க்கெ𑌼ல் கீர்க்க பே𑌼செ𑌼த𑌼ெ𑌼. அன் சூன் மாமெ𑌼ன் இலி மாமெ𑌼னா நெ𑌼ய்ராட்டு மாக்க நீராட்டு கீரோக𑌼ி இப்பெ𑌼 அலி ஓக்க ஒல்செ𑌼த𑌼ெ𑌼.
அன் இலி மாமெ𑌼ன் ஆ கீர்ல் இப்பெ𑌼த்தெ𑌼ரோட𑌼 சூன் மாமெ𑌼ன் இல்க்க ப𑌼ன்ட𑌼ெ𑌼த𑌼ெ𑌼 அன்பெ𑌼னு கே𑌼ட்டெ𑌼த𑌼ெ𑌼. அன் அக𑌼ெ𑌼 சூன் மாமெ𑌼ன் திச்செ𑌼ஙா ப𑌼ாட்டு மாக்க நிச்செ𑌼 தீட்டித𑌼ெ𑌼ஙா நிச்செ𑌼 கொட𑌼ுக்க காத்தி கூட்னிட்டு, நிய்யெ𑌼 ப𑌼னுஙா இட்டி அலி ஓக்கமா பொக்கெ𑌼செ𑌼த𑌼ெ𑌼 எ𑌼ன்ட𑌼ெக𑌼ெ𑌼. அன் இலி மாமெ𑌼ன் கொத்தெ𑌼லெ𑌼 எ𑌼ட்ன் பெ𑌼ய்ட்டு அலியா அக𑌼்த𑌼்த𑌼ெ𑌼னு அக𑌼்த𑌼்த𑌼ெ𑌼னு பே𑌼செ𑌼ஙா, அன் சூன் மாமெ𑌼ன் ப𑌼ாலெ𑌼 கன்ட𑌼ெ𑌼த𑌼ெ𑌼. அன் இலி மாமெ𑌼ன் சூன் மாமெ𑌼ன் ப𑌼ாலியா தூன்ட𑌼ெ𑌼ஙா கீ எ𑌼ன்ட𑌼ெ𑌼த𑌼ெ𑌼. பின அக𑌼்த𑌼்த𑌼ெ𑌼னு அக𑌼்த𑌼்த𑌼ெ𑌼னு பே𑌼செ𑌼ஙா ப𑌼ென்னி கன்ட𑌼ெ𑌼த𑌼ெ𑌼. அன் ப𑌼ென்த்தெ𑌼ல் தூன்ட𑌼ெ𑌼ஙா கீ எ𑌼ன்ட𑌼ெ𑌼த𑌼ெ𑌼. அன் இலி மாமெ𑌼ன் சூன் மாமெ𑌼னா கென்க𑌼ாட்டு சூன் மாமெ𑌼ன் தோலியா தங் கீர் ப𑌼ங்க𑌼ாட்ல் கட்டெ𑌼செ𑌼த𑌼ெ𑌼.
ஆங் மய்ராட்டு சூன் மாமெ𑌼னா ஏக்கிரி அட்டெ𑌼த𑌼ெ𑌼. அன்ட𑌼ெ𑌼 தன்ன சூன் மாமெ𑌼ன் தன் அப𑌼்ப𑌼ி அமெ𑌼ன் எ𑌼ட𑌼்ட𑌼ாளு இதெ𑌼ர் கீர்க்க பே𑌼செ𑌼க𑌼ெ𑌼. அக𑌼ெ𑌼 பெ𑌼ய்ட்டு இலி மாமெ𑌼னோட𑌼 சூன் மாமெ𑌼ன் எட்லா பே𑌼செ𑌼த𑌼ெ𑌼 எ𑌼ன்ட𑌼ெ𑌼க𑌼ெ𑌼. அன் இலி மாமெ𑌼ன் ஈட்டு அதெ𑌼ரோட𑌼 ஆட𑌼ெ𑌼 மேசெ𑌼 மக்கெ𑌼 ப𑌼ெ𑌼ய்லியமா பெ𑌼ய்னட𑌼ெ𑌼த𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் சூன் மாமெ𑌼ன் அப𑌼்ப𑌼ி அமெ𑌼ன் எ𑌼ட𑌼்ட𑌼ாளு ஆட𑌼ெ𑌼 மேசெ𑌼 மக்கெ𑌼 ப𑌼னுஙா அதெ𑌼ரோட𑌼 கே𑌼ட்டெ𑌼க𑌼ெ𑌼. அன் அக𑌼ெ𑌼 எ𑌼ர்க𑌼ித𑌼ா சூன் மாமெ𑌼ன் யங் ப𑌼ெ𑌼ய்லியா ப𑌼ன்ட𑌼ெ𑌼த𑌼ிலமா எ𑌼ன்ட𑌼ெ𑌼க𑌼ெ𑌼. அன் இலி மாமெ𑌼ன் ஆங்க𑌼ுத𑌼ெ𑌼, எ𑌼த்தெ𑌼 மே𑌼செ𑌼 மக்கெ𑌼 ப𑌼ெ𑌼ய்லியா பெ𑌼ய்னட𑌼ெ𑌼த𑌼ெ𑌼 பட𑌼மா எ𑌼ன்ட𑌼ெ𑌼த𑌼ெ𑌼. எ𑌼த்தெ𑌼 மே𑌼செ𑌼 மக்கெ𑌼 ஒப்பாத்து ஏ𑌼ளு மெ𑌼ய்னியெ𑌼 ஆப்மா கீர்க்க ப𑌼ாட𑌼்லாயெ𑌼, அன்க𑌼ுனு நிங்க𑌼ெ𑌼 நிச்செ𑌼 தின்ட𑌼க𑌼ோ எ𑌼ன்ட𑌼ெ𑌼த𑌼ெ𑌼. அன் அக𑌼ெ𑌼 எ𑌼ட𑌼்ட𑌼ாளு நிச்செ𑌼 புட்டெ𑌼 ஏக்கிரி ஒட்டயா தின்ட𑌼ெ𑌼க𑌼ெ𑌼. தின்ட𑌼ாட்டு அக𑌼ெ𑌼 ப𑌼ங்க𑌼ாட்ல் தீக்கினித𑌼ெ𑌼 தோலியா கிரி அக𑌼ெ𑌼 நோட்செ𑌼லு.
பின ஏ𑌼ளு மெ𑌼ய்னியெ𑌼 ஆசெ𑌼ஙா, எ𑌼த்தெ𑌼 மேசெ𑌼 மக்கெ𑌼 ப𑌼ன்ட𑌼ெ𑌼க𑌼ெ𑌼. அன் அதெ𑌼ரோட𑌼 இக𑌼ெ𑌼 தோய் யங் சூன் மாமெ𑌼ன் எட்லி எ𑌼ன்ட𑌼ெ𑌼க𑌼ெ𑌼. அன் எ𑌼த்தெ𑌼 மேசெ𑌼 மக்கெ𑌼 சூன் மாமெ𑌼ன் யங் ப𑌼ெ𑌼ய்லியா ப𑌼ன்ட𑌼ெ𑌼த𑌼ிலமா எ𑌼ன்ட𑌼ெ𑌼க𑌼ெ𑌼. அன் இலி மாமெ𑌼ன் சூன் மாமெ𑌼ன் தன் அப𑌼்ப𑌼ி அமெ𑌼னோட𑌼 நிங்க𑌼ெ𑌼 இன்தன்ன தின்ட𑌼ெ𑌼 எ𑌼ர்ச்சி ஏக்கிரி தனு நிங் மஙெ𑌼னு எ𑌼ன்ட𑌼ாட்டு, ஆங் பெ𑌼த𑌼ாட்டு இலி மாமெ𑌼ன் ஆட்செ𑌼த𑌼ெ𑌼. அன் சூன் மாமெ𑌼ன் அப𑌼்ப𑌼ி அமெ𑌼ன் எ𑌼ட𑌼்ட𑌼ாளு அத்தெ𑌼னு தங் கீர்க்க பே𑌼செ𑌼க𑌼ெ𑌼.
