முத்தெ𑌼ரெ𑌼 கும்ப𑌼ெ𑌼ட𑌼ெ𑌼க𑌼ெ𑌼

முத்தெ𑌼ரெ𑌼 கும்ப𑌼ெ𑌼ட𑌼ெ𑌼க𑌼ெ𑌼

யங்க𑌼ெ𑌼 பண்ட𑌼ய இத𑌼ெ𑌼னு இன்ட𑌼ுக𑌼ுனு செ𑌼தெ𑌼னே𑌼னிப்பெ𑌼 ஆள்க𑌼ெ𑌼ட𑌼்ன தனு யங்க𑌼ெ𑌼 முத்தெ𑌼ர் கும்ப𑌼ெ𑌼ட𑌼ெ𑌼க𑌼ெ𑌼. யங்க𑌼ெ𑌼 நங மன்செ𑌼ன்ட𑌼ெ𑌼 ஆள்க𑌼ெ𑌼ர்க்க அம்ப𑌼ாலி அன்ப𑌼ெ𑌼னு ஒன்ட𑌼ெ𑌼 க𑌼ுய்ரியெ𑌼 உன்ட𑌼ு. அம்ப𑌼ாலி ப𑌼ாட்டு ஒட்டய நங மன்செ𑌼ன்ட𑌼ெ𑌼 இப்பெ𑌼 மெ𑌼த்தெ𑌼ர்ல் ஈ அம்ப𑌼ாலி உன்ட𑌼ு. யங்க𑌼ெ𑌼 நல் நாள்த்தெ𑌼ங இசிரி அம்ப𑌼ால்தெ𑌼ல் த𑌼வெ𑌼லெ𑌼 குய்ட்னு , கலலெ𑌼 புட𑌼்செ𑌼னு அம்ப𑌼ால்த𑌼ெ𑌼ல் யங்க𑌼ெ𑌼 நங மன்செ𑌼ன்ட𑌼ெ𑌼 ஆட்டிய ஆட𑌼ியு. ஓணி ப𑌼ெ𑌼ளெ𑌼வெ𑌼 இசிரி ஆப்பெ𑌼ன் எ𑌼ட𑌼்லுஙா அம்ப𑌼ால்தெ𑌼ல் தவெ𑌼லெ𑌼 குய்ட்னு , கலலெ𑌼 புட𑌼்செ𑌼னு அம்ப𑌼ால்தெ𑌼ல் ஒட்டயாளு கூட்னிப்பியு. அதெ𑌼ர் அதெ𑌼ரெ𑌼 நாட𑌼் மக்கெ𑌼,

( ப𑌼ுய்ட்மேலூக𑌼ெ𑌼, ஏ𑌼ம்ப𑌼ே𑌼ளூக𑌼ெ𑌼, ப𑌼ூசாலூக𑌼ெ𑌼, ) எ𑌼ர்ஜ்க்க ஒன்னாட𑌼ி அதெ𑌼ர் ஏ𑌼ய்ல்தெ𑌼ல் எர்ஜெ𑌼ன் ப𑌼ிஞ்ஜி அன்ப𑌼ெ𑌼னு ஒன் ப𑌼ிஞ்ஜி கல்லியு. ஆ எர்ஜெ𑌼ன் பிஞ்ஜி கல்லெ𑌼க𑌼ெ𑌼 ப𑌼ாட்டு அதெ𑌼ர் ஏ𑌼ய்ல் இப்பெ𑌼 ஆள்க𑌼ெ𑌼, பின ஒட்டயாளு நல்லய இத𑌼்த𑌼ப்பெ𑌼லமா எ𑌼ன்ட𑌼ட்டு கல்லெ𑌼க𑌼ெ𑌼 தனு எர்ஜெ𑌼ன் பிஞ்ஜி. யங்க𑌼ெ𑌼ர்க்க தொனாரெ𑌼 திங்க𑌼ெ𑌼லெ𑌼 அன்பெ𑌼னு ஒன் திங்க𑌼ெ𑌼லெ𑌼 உன்ட𑌼ு. ஆ திங்க𑌼ெ𑌼ல்த்தெ𑌼ல் பித்தேரி அன்பெ𑌼னு ஒன் நல் நாள்த்தெ𑌼ல் மிந்த𑌼ய இசிரி கத𑌼்த𑌼ெ𑌼ல் ப𑌼த்தி நட்னு பித்தேரி நால்தெ𑌼ல் ப𑌼த் கத𑌼ெ𑌼ரெ𑌼, தே𑌼ன் கத𑌼ெ𑌼ரெ𑌼, மாங்க𑌼 யலி, நவனி கத𑌼ெ𑌼ரெ𑌼 ஈன இசிரி ப𑌼ங்க𑌼ாட்ல் கட்டெ𑌼க𑌼ெ𑌼. பின ப𑌼த் கத𑌼ெ𑌼ரெ𑌼 கெ𑌼ஜ்ஜெ𑌼னு ப𑌼த்திய எ𑌼ட்சாட்டு ஆ இக்கிய எ𑌼ட்னு பின நிச்செ𑌼 அட்னு முத்தெ𑌼ர் கும்ப𑌼ெ𑌼ட𑌼ெ𑌼க𑌼ெ𑌼. பின யங்க𑌼ெ𑌼 எர்ஜெ𑌼ன் ப𑌼ிஞ்ஜி கல்த𑌼ொட்டெ𑌼க𑌼ெ𑌼. பின யங்க𑌼ெ𑌼 நங மன்செ𑌼ட𑌼ெ𑌼 ஆள்க𑌼ெ𑌼ர்க்க அதெ𑌼ரெ𑌼 ஏ𑌼ய்ல்தெ𑌼ல் அதெ𑌼ர்க்க அன்பெ𑌼னு ஒனொன்ட𑌼ெ க𑌼ுய்ரியெ𑌼 உன்ட𑌼ு. ஆ க𑌼ுய்ரியெ𑌼 பூஜி ஆப்பெ𑌼 சமித்தெ𑌼ல் யங்க𑌼ெ𑌼 நங மன்செ𑌼ன்ட𑌼ெ𑌼 ஆள்க𑌼ெ𑌼 தவெ𑌼லெ𑌼 எ𑌼ட்னு பெ𑌼ய்ட்டு ஆ தவெ𑌼லெ𑌼 குட்டெ𑌼சனி தனு ஆ க𑌼ுய்ரித்தெ𑌼ல் பூஜி தொட𑌼ெங்க𑌼ெ𑌼க𑌼ெ𑌼. பின ஆ க𑌼ுய்ரித்தெ𑌼ல் பூஜி தொட𑌼ெ𑌼ங்க𑌼ெ𑌼 நாள்த்தெ𑌼ல் இத𑌼ெ𑌼னு எர்க𑌼ிஙா, ஒப்பத்தெ𑌼ங, எ𑌼ட𑌼்லுஙா இசிரி தவெ𑌼லெ𑌼 குய்ட்னு , கலலெ𑌼 புட𑌼்செ𑌼னு யங்க𑌼ெ𑌼 ஆள்க𑌼ெ𑌼 நங்க𑌼ாட்டிய ஆட𑌼ெ𑌼க𑌼ெ𑌼. பின ஆ க𑌼ுய்ரியெ𑌼 பூஜி திதோக𑌼ுனு ஆ க𑌼ுய்ரித்தெ𑌼ல் தன்ன இப்பெ𑌼க𑌼ெ𑌼.

ஆ க𑌼ுய்ரிக்க போப்பெ𑌼 சமித்தெ𑌼ல் யங்க𑌼ெ𑌼 ஆள்க𑌼ெ𑌼 அம்ப𑌼ால்தெ𑌼ல் நிச்செ𑌼 அட்னு ஆ நிச்சிய முத்தெ𑌼ர்க்க எ𑌼ட்சாட்டு பின முத்தெ𑌼ரெ𑌼 ஆய்ட𑌼்னு முத்தெ𑌼ரொட𑌼 ப𑌼ாஜ் கே𑌼ட்டாட்டு பின முத்தெ𑌼ரெ𑌼 போக்க பெ𑌼த𑌼னி பின க𑌼ுய்ரிக்க தவெ𑌼லெ𑌼 கலலெ𑌼 எ𑌼ட்னு போப்பெ𑌼க𑌼ெ𑌼. யங்க𑌼ெ𑌼 ஆள்க𑌼ெ𑌼ர்க்க முத்தெ𑌼ர் சத்தாரி ஆசனி ஆண ப𑌼ிஞ்ஜ் கல்த𑌼ெ𑌼னு பின ஆ கண்கிய சிர்மாட𑌼ியு. பின மக்கெ𑌼 உட்டாசனி அதெ𑌼ர் கீர்ல் இப்பெ𑌼 மன்செ𑌼ன்ட𑌼ெ𑌼 அஜ்க்க நிச்செ𑌼 அட𑌼ியுமு அன்பெ𑌼னு பெ𑌼த𑌼ாட்டு, பின உட்டய்னிப்பெ𑌼 மாக்க அஜ் நிச்செ𑌼 அட்னு , பின அஜாய்ட𑌼்னு பின ஆ அஜ் நிச்சிய ஒப்பெ𑌼செ𑌼னு ஏ𑌼ள் அஜெ𑌼ர்க்க ப𑌼ெட்லி உட்னு ஒப்பெ𑌼செ𑌼க𑌼ெ𑌼. பின அஜாட𑌼ெ𑌼 பெ𑌼ணாக்கெ𑌼ன்ட𑌼ெ𑌼 தினனி பின ஆளிச்செ𑌼ரி திம்ப𑌼ெ𑌼க𑌼ெ𑌼. கீர்ல்சமியெ𑌼 இப்பெ𑌼 பெ𑌼ணாக்ஙா மக𑌼்க𑌼ி கெ𑌼ட𑌼்சானி என்ப𑌼த𑌼ு நாள்த்தெ𑌼ல் கீரி மெக்கே𑌼னு ஆ மாக்க அஜாட𑌼ெ𑌼க𑌼ெ𑌼. பின செ𑌼தெ𑌼னே𑌼னிப்பெ𑌼 மன்செ𑌼ன்ட𑌼ெ𑌼ட𑌼்க என்ப𑌼த𑌼் நாள்த்தெ𑌼ல் பெள ப𑌼ிஞ்ஜி கல்த𑌼ெ𑌼னு அதெ𑌼ட𑌼்ன நூட𑌼்ஜெ𑌼ன் கால்தெ𑌼ல் இப்பெ𑌼 தேவிக𑌼ெ𑌼ப்பிலி, பின ஏ𑌼ள் அஜெ𑌼ரிப்பிலி ஒப்பெ𑌼சியுமு. பின அதெ𑌼ர் ஏ𑌼ய்ல்தெ𑌼ல் ப𑌼ிஞ் கல்த𑌼ெ𑌼னு அதெ𑌼ட𑌼்ன அய்ர்கெ𑌼னு எ𑌼ட்சியுமு. யங்க𑌼ெ𑌼 முத்தெ𑌼ரெ𑌼 கும்ப𑌼ெ𑌼ட𑌼ெ𑌼க𑌼ெ𑌼 ப𑌼ாட்டு பண்ட𑌼ய செ𑌼தெ𑌼னே𑌼னிப்பெ𑌼 மன்செ𑌼ன்ட𑌼ெ𑌼ட𑌼்ன பின இன செ𑌼தெ𑌼னே𑌼னிப்தெ𑌼ட𑌼்ன இசிரி தனு. முத்தெ𑌼ரெ𑌼 ஆட𑌼ெ𑌼 மன்செ𑌼ன் முத்தெ𑌼ரெ𑌼 ஆய்ட𑌼்னு செதெ𑌼னே𑌼னிபெ𑌼தெ𑌼ட𑌼்ன யார்த்தெ𑌼னெ𑌼 அதெ𑌼ரொட𑌼 ப𑌼ெல்கிஜெ𑌼னு ப𑌼ெ𑌼ட்மாட𑌼் கால்ன் முத்தெ𑌼ராட𑌼ெ𑌼த𑌼ெ𑌼. யங்க𑌼ெ𑌼 முத்தெ𑌼ரெ𑌼 ஆட𑌼ெ𑌼க𑌼ெ𑌼 எ𑌼ட𑌼்லுஙா தனு. எ𑌼ட𑌼்லுஙா முத்தெ𑌼ரெ𑌼 ஆட்சனி தனு நர் கெ𑌼ட்டெ𑌼த𑌼ெ𑌼. எ𑌼ட𑌼்லுஙா முத்தெ𑌼ராட𑌼்லயெ𑌼 தொட𑌼ெ𑌼க𑌼ெசனி பின்பெ𑌼 நாளெ𑌼 எ𑌼ர்க𑌼ிஙா தனு முத்தெ𑌼ரெ𑌼 ஆய்ட𑌼்னு திதாவெ𑌼க𑌼ெ𑌼. அஜாட𑌼ெ𑌼க𑌼ெ𑌼 ப𑌼ாட்டு யன் ப𑌼ே𑌼ட𑌼்பட்டானி ஆட𑌼ெ𑌼க்கு.