ஒன் பெ𑌼ணாக்கெ𑌼ன் ப𑌼ாளு கத𑌼ி
ஒன்ட𑌼ெ𑌼 ஈர்ல் ஒன் மெ𑌼த்திரி இத𑌼்த𑌼ெ𑌼. ஆ மெ𑌼த்திர்ல் கேத்தி அன்பெ𑌼னு ஒன்ட𑌼ெ𑌼 உட𑌼்க𑌼ித்தி இத𑌼்த𑌼ெ𑌼. ஆ கேத்தி உட்டாசெ𑌼 குப்பார் மெ𑌼த்திர்ல் தானு. கேத்தி தங்க𑌼ப𑌼்ப𑌼ி ப்யாரெ𑌼 ப𑌼ும்மாக்கெ𑌼ன். அம்மெ𑌼ன் ப்யாரெ𑌼 மாற்ன். கேத்தி ப𑌼ெ𑌼ய்லியா உட்டாசெ𑌼க𑌼ாளு நாக்காளு தானு. கேத்திக்கா பத்தெ𑌼 வொய்செ𑌼 இப்பெ𑌼ன் கேத்தி தஙக𑌼ம்மெ𑌼ன் நும்ப𑌼ெ𑌼லெ𑌼 ஆய்னு செ𑌼த்தெ𑌼னே𑌼செ𑌼த𑌼ெ𑌼. அத𑌼ெ𑌼ங்க𑌼ட்னிரி அதெ𑌼ர் குட𑌼ெ𑌼ம்ப𑌼ெ𑌼ல் இப்பெ𑌼த்தெ𑌼ர்க்கா தின்லாயெ𑌼 உட𑌼்லாயெ𑌼 குப்பாய்க்கிசிரி ப𑌼ாள் பாட𑌼ெ𑌼 ஆசெ𑌼த𑌼ெ𑌼. அதெ𑌼ர் கீரி ப𑌼ிர்க்கெ𑌼ல் இப்பெ𑌼 ப𑌼ட𑌼்ன்ட𑌼ெ𑌼 கீர்ல்லா யர்த𑌼்த𑌼ெ𑌼ன் தின்னு த𑌼ப்பாசெ𑌼க𑌼ெ𑌼. மாக𑌼ால் சமித்தெ𑌼ல் கீரி நெந்த𑌼ானி ப𑌼ாள் யலியா தர்ச்செ𑌼னு கீருக்கா பொத𑌼்த𑌼ெ𑌼னு இத𑌼ொட்டெ𑌼க𑌼ெ𑌼. பின ஒன்டெ𑌼 கேத்தி குட𑌼ெ𑌼ம்ப𑌼ோட𑌼 த்யனம்ப𑌼்யாரெ𑌼 மெ𑌼த்திர்க்கா ப𑌼ன்ட𑌼ெ𑌼க𑌼ெ𑌼. பின கேத்தி கிரி வொய்செ𑌼 இப்பெ𑌼ன் தன்ன பெ𑌼ய்னிக்கா போக𑌼ெ𑌼ல் தொட𑌼ெ𑌼ங்க𑌼ெ𑌼செ𑌼த𑌼ெ𑌼. ஆ சமித்தெ𑌼ல் அதெ𑌼ர்க்கா கால்லுப்பாயெ𑌼 தானு கூய்லி கொட்டொட்டெ𑌼க𑌼ெ𑌼. கேத்திக்கா பானாக்கெ𑌼 வொய்செ𑌼 இப்பெ𑌼ன் காள்ன் அம்ப𑌼ெ𑌼 மன்செ𑌼ஙா மத𑌼ெ𑌼வெ𑌼 மாய்ர்னு கொட்டெ𑌼க𑌼ெ𑌼. அத𑌼ங்க𑌼ி மத𑌼ெ𑌼வெ𑌼 ஆய்னு ப𑌼ாளெ𑌼ன் அதெ𑌼ர்க்கா மூறு மக்கெ𑌼 உட்டாசெ𑌼க𑌼ெ𑌼. எ𑌼ட𑌼்ட𑌼ு பெ𑌼ணாக்கெ𑌼ன் மக்கெ𑌼, பின ஒன்ட𑌼ாளு க𑌼ெ𑌼ணெ𑌼 மக𑌼்க𑌼ி தானு. கேத்தி க𑌼ெ𑌼ண்ட𑌼ாளெ𑌼 கூய்லி பெ𑌼ய்னிக்கா தானு பெ𑌼ய்யொட்டெ𑌼த𑌼ெ𑌼. கேத்தி தன் க𑌼ெ𑌼ண்ட𑌼ாளெ𑌼ப𑌼்ப𑌼ெ𑌼ரு நலாய ப𑌼ாள்த𑌼்த𑌼ெ𑌼னு ப𑌼ன்ட𑌼ெ𑌼க𑌼ெ𑌼. ஒன்டெ𑌼 கேத்தி க𑌼ெ𑌼ண்ட𑌼ாளெ𑌼 நும்ப𑌼ெ𑌼லெ𑌼 ஆய்னு ஏ𑌼ளு எர்ஜிக்கா மிந்த𑌼ி செ𑌼த்தெ𑌼னே𑌼செ𑌼த𑌼ெ𑌼. பின கேத்திக்கா எ𑌼லுவத்தெ𑌼 வொய்செ𑌼 ஆசெ𑌼த𑌼ெ𑌼. கேத்தி தன் மங்ஙெ𑌼னு கீர்ல் தானு இன அவொட𑌼ெ𑌼த𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼