ப𑌼த்திமா திம்ப𑌼ெ𑌼 யானி
ஒன்ட𑌼ெ𑌼 ஈர்ல் மூறு மெ𑌼த்திரி பட்டெ𑌼த𑌼ெ𑌼. ஆ மெ𑌼த்திர்க𑌼ெ𑌼 ப்யார்க𑌼ெ𑌼, கத𑌼ெ𑌼ல் மெ𑌼த்திரி, பெ𑌼ய்ட் மெ𑌼த்திரி பின த𑌼ப் மெ𑌼த்திரி தானு. ஆ மெ𑌼த்திர்ல் இப்பெ𑌼 மன்ட𑌼ெ𑌼 அதெ𑌼ர் அதெ𑌼ர் கத𑌼்த𑌼ெ𑌼லா ப𑌼த்தி நட்னித𑌼ெ𑌼க𑌼ெ𑌼. பின ப𑌼த்திமா ப𑌼ெ𑌼ள்த𑌼ெ𑌼ஙா ஆன கெ𑌼ஜ்ஜெ𑌼னு கத𑌼ெ𑌼ல் மெ𑌼த்திரில் இப்பெ𑌼 ஒன் கீர்ல் ஆ ப𑌼த்தியா எ𑌼ட்னு பெ𑌼ய்ட்டு எ𑌼ட்செ𑌼னித𑌼ெ𑌼க𑌼ெ𑌼. ஒன்டெ𑌼 ஆ ஈர்க்க யானி பே𑌼செ𑌼த𑌼ெ𑌼. மிந்த𑌼ாய அன் தானு ஆ மெ𑌼த்திர்க்கா யானி பே𑌼செ𑌼த𑌼ெ𑌼. ஆ யானி ஆ மெ𑌼த்திரி ப𑌼ிர்க்கெ𑌼ல் ஒன் பெ𑌼ய்ர்க𑌼ாட்ல் இத𑌼ெ𑌼னு தானு யானி ஒப்பாத்தெ𑌼ஙா மெ𑌼த்திர்க்கா பே𑌼செ𑌼த𑌼ெ𑌼. அன் யானி மெ𑌼த்திரி ப𑌼ிர்க்கெ𑌼ல் இத𑌼ெ𑌼 கத𑌼்த𑌼ெ𑌼லா நட்னித𑌼ெ𑌼, ப𑌼ாளியா யானி தின்ட𑌼ாட்டு, ஆங்தன்ன ஆ கத𑌼ெ𑌼ல் மெ𑌼த்திரக்கா யானி பே𑌼செ𑌼த𑌼ெ𑌼. பெ𑌼ய்ட்டு ஆ ப𑌼த்தி எ𑌼ட்செ𑌼னித𑌼ெ𑌼 கீர் மத𑌼ெ𑌼லிய உர்செ𑌼க𑌼த𑌼்த𑌼ெ𑌼. அன் தானு மெ𑌼த்திர்ல் இப்பெ𑌼 மன்செ𑌼ன்ட𑌼ெ𑌼 யானியா மிந்த𑌼ாய நோட𑌼்செ𑌼க𑌼ெ𑌼. அன் ஜனக𑌼ெ𑌼 யானிய அட்டெ𑌼செ𑌼ங, யானீட்டு ஜனக𑌼ெ𑌼ர்ன அட்டெ𑌼செ𑌼த𑌼ெ𑌼. அன் கத𑌼ெ𑌼ல் மெ𑌼த்திர்ல் இத𑌼ெ𑌼 ஜனக𑌼ெ𑌼 அல்லித𑌼ெ𑌼னு பெ𑌼ய்ட் மெ𑌼த்திர்க்கா காவாயெ𑌼லா ப𑌼ுத𑌼்த𑌼ெ𑌼னு ஓட𑌼்செ𑌼க𑌼ெ𑌼. பின யானி கீரியா பிர்செ𑌼க𑌼ாட்டு, அல் பட்டெ𑌼 ப𑌼த்த𑌼ெ𑌼க𑌼ெ𑌼ர்ன தின்ட𑌼ெ𑌼த𑌼ெ𑌼. பின யானி எ𑌼ர்லுஙா ஆ மெ𑌼த்திர்ல் தன்ன இத𑌼்த𑌼ெ𑌼. எ𑌼ர்க𑌼ித𑌼ெ𑌼ங தானு யானி மெ𑌼த்திர்ல் இத𑌼ெ𑌼னு பெ𑌼ய்ர்க𑌼ாட்க்கா பே𑌼செ𑌼த𑌼ெ𑌼. யானி பெ𑌼ய்ர்க𑌼ாட்க்கா பே𑌼செ𑌼ஙா தானு ஜனக𑌼ெ𑌼 பெ𑌼ய்ட் மெ𑌼த்திர்லித𑌼ெ𑌼னு கத𑌼ெ𑌼ல் மெ𑌼த்திர்க்கா பே𑌼செ𑌼க𑌼ெ𑌼. ஜனக𑌼ெ𑌼 மெ𑌼த்திரக்கா பெ𑌼ய்ட்டு நோட𑌼்ன், ஆ கீர்ல் பட்டெ𑌼 ப𑌼த்தியா ஒட்டயா யானி தின்னு, கீரியா த𑌼ூள் த𑌼ூள்ளெ𑌼 மாய்ர்னு எ𑌼ட்செ𑌼னித𑌼்த𑌼ெ𑌼.
இன் பெ𑌼த𑌼ெ𑌼னாட𑌼ெ𑌼 காய்ரிக𑌼ெ𑌼