ஒன் ராஜெ𑌼ஙா ஏ𑌼ள் மக்கெ𑌼 இத𑌼ெ𑌼க𑌼ெ𑌼. அல்லி ஆறாளு பெ𑌼ணாக்கெ𑌼ன் கூய்ணான்னர்க்க𑌼ெ𑌼. ஒன்ட𑌼ாளு பெ𑌼ணாக்கெ𑌼ன் குய்ணான்லா. பின ஆக𑌼ெ𑌼 ஒட𑌼்ட𑌼ாளு நிச்செ𑌼 திம்ப𑌼ெ𑌼 சமியெ𑌼 ஆப்பெ𑌼ன் ஆ கீர்ல் இப்பெ𑌼 பெ𑌼ணாக்கெ𑌼ன்ட𑌼ெ𑌼 தங் மண்ல் இத𑌼ெ𑌼னு ப்யானிய எ𑌼ட்னு கித்தொட்டெ𑌼க𑌼ெ𑌼. அன் அதெ𑌼ரோட𑌼 தங் மாமெ𑌼ன் ஒட்டயாமெ𑌼ஙா யானல்க𑌼ி ப𑌼ே𑌼ட𑌼்ன் தன்னர்த𑌼்த𑌼லா ஆண எ𑌼ட்னு ப்யானெ𑌼 ப𑌼த்தெ𑌼க்கலா, ஐனிஙா ஈங்க𑌼ி ப்யானிய எ𑌼ட்னு நிச்செ𑌼 திம்ப𑌼ெ𑌼 சமிக்க ப்யானெ𑌼 எ𑌼ட்னு பெ𑌼ய்ரிசொட𑌼ெ𑌼க𑌼ெ𑌼 எ𑌼ன்ட𑌼ெ𑌼த𑌼்த𑌼ெ𑌼. அன் ஆ பெ𑌼ணாக்கெ𑌼ன்ட𑌼ெ𑌼 தங் மாமெ𑌼னொட𑌼 ஆங்க𑌼சனி நின் கர்க𑌼ஜிலி மங்ஙா நாராய்ன் உட𑌼்க𑌼ித்திய குய்ட்ன் ப𑌼ாட்டு பெ𑌼ணாக்கெ𑌼ன் கொட்டக𑌼ோ அன்பெ𑌼னு ஆ பெ𑌼ணாக்கெ𑌼ன்ட𑌼ெ𑌼 பெ𑌼த𑌼ெ𑌼க𑌼ெ𑌼. அன் ஆ கர்க𑌼ஜிலி உட𑌼்க𑌼ெ𑌼ன் சொட𑌼ியெ𑌼 எ𑌼ல்க𑌼ெ𑌼னு நிச்செ𑌼 தின்ல்த𑌼ீ பே𑌼செ𑌼த𑌼ெ. பின ஒன்ட𑌼ிட𑌼்ட𑌼ு நாளெ𑌼 ஈட்டு கர்க𑌼ஜிலி உட𑌼்க𑌼ெ𑌼ன் தங் கீர்ல் இத𑌼ெ𑌼னு எட்ன்காட்டு பெ𑌼ய்ட்டு நாராய்ன் மக𑌼ெ𑌼லிய பெ𑌼ணாக்கெ𑌼ன் கூய்ணாட𑌼்லயெ𑌼 பே𑌼செ𑌼த𑌼ெ𑌼. அன் ஒன் முத்க்கி ஆ உட𑌼்க𑌼ெ𑌼னொட𑌼 ஐன்ட𑌼செ𑌼த𑌼ெ𑌼 இலிய ப𑌼ன்னட𑌼ியி எ𑌼ன்ட𑌼ெ𑌼த𑌼ெ𑌼. அன் உட𑌼்க𑌼ெ𑌼ன் ஐன்ட𑌼ிலமா பெ𑌼த்தே𑌼னி ப𑌼ன்ட𑌼ுமு. எ𑌼ன்ட𑌼ெ𑌼த𑌼ெ𑌼. அன் முத்க்கி ஐன்னங்சிரி உன்ட𑌼ி இல்கெ𑌼ன் நிய்யெ𑌼 ப𑌼ாட𑌼்ளிலிமி எ𑌼ன்ட𑌼ெ𑌼த𑌼ெ𑌼. அன் உட𑌼்க𑌼ெ𑌼ன்ஆ முத்க்கொட𑌼 தங் கீர்ல் நர்த𑌼்த𑌼ெ𑌼 ஒட்டய காய்ரிய பெ𑌼த𑌼்த𑌼ெ𑌼. அன் ஆ முத்க்கி சிரிமி இன ஒன்ட𑌼ீட்டு நாராய்ன் மக𑌼ெ𑌼ல்க𑌼ெ𑌼 நீராட𑌼்லாயெ𑌼 ப𑌼ுப்பியுமு, அன் அதெ𑌼ட𑌼்ன நோட𑌼்லயெ𑌼 பீக𑌼ே எ𑌼ன்ட𑌼ெ𑌼த𑌼ெ𑌼. அன் உட𑌼்க𑌼ெ𑌼ன் சிரிமி எ𑌼ன்ட𑌼ாட்டு பின உட𑌼்க𑌼ெ𑌼ன் பே𑌼செ𑌼த𑌼ெ𑌼. அன் நாராய்ன் மக𑌼ெ𑌼ல்க𑌼ெ𑌼 ஒட்டயாளு ஒன் காயெ𑌼 ஓக𑌼ி இத𑌼ெ𑌼னு நீராட𑌼்லாயெ𑌼 ப𑌼ன்ட𑌼ெ𑌼க𑌼ெ𑌼. அன் ஆண ஆ உட𑌼்க𑌼ெ𑌼ன் நே𑌼ய்ராட்டு ஒன் காயெ𑌼 பின தீரி எ𑌼ட்னு ஒல்பிசெ𑌼னு கத்த𑌼ெ𑌼. பின அக𑌼ெ𑌼 ஒட்டயாளு நீராய்ராட்டு அதெ𑌼ர் அதெ𑌼ர் காயெ𑌼 ஓக𑌼ி பொக்கெ𑌼செ𑌼க𑌼ெ𑌼. பின ஒன் நாராய்ன் மக𑌼ெ𑌼லெ𑌼 மாத்திரி தன் காயெ𑌼 திரிய காம்ப𑌼ெ𑌼ளமா எ𑌼ன்ட𑌼ாட்டு, பின உட𑌼்க𑌼ித்தி ஆ காயா தரேத்தெ𑌼னு ஆகாயெ𑌼 ஓக்க பொக்கெ𑌼செ𑌼த𑌼ெ𑌼. பின ஆ உட𑌼்க𑌼ெ𑌼ன் ஆ காய எ𑌼ட்னு பெ𑌼ய்ட்டு ஒன்ட𑌼ெ𑌼 ஆல்ம்யரி க𑌼ெ𑌼ட்ல் கூட்னித𑌼்த𑌼ெ𑌼. பின ஆ காயா ப𑌼ிர்கெ𑌼ல் எ𑌼ட்சாட்டு ஆ உட𑌼்க𑌼ெ𑌼ன் நல்லய அர்க𑌼ெ𑌼செ𑌼த𑌼ெ𑌼. பின ஆ உட𑌼்க𑌼ித்தி ஆ காயெ𑌼ல் இத𑌼ெ𑌼னு ப𑌼ெ𑌼சாட்டி ப𑌼ாட்டு ஆ உட𑌼்க𑌼ெ𑌼ன் மண்ல் ப்யானெ𑌼 கித்தி கூட்னித𑌼்த𑌼ெ𑌼. அன் கோட்ல் இப்பெ𑌼 முண்ட𑌼ெ𑌼க𑌼ெ𑌼ர்சி ஆ ப𑌼ட்ல்லா ப𑌼ன்ட𑌼ெ𑌼த𑌼ெ𑌼. ப𑌼ாட்டு நாராய்ன் மக𑌼ெலொட𑌼 ப𑌼ரே நங்க𑌼ெ𑌼 எ𑌼ட𑌼்ட𑌼ாளு அட்ட நீர் ப𑌼ாவெ𑌼ல் பெ𑌼ய்ட்டு குய்ங்ஙெ𑌼னி நோட𑌼ா எ𑌼ன்ட𑌼ெ𑌼த𑌼ெ𑌼. அன் நாராய்ன் மக𑌼ெ𑌼லெ𑌼 நவெ𑌼 இலமா. இத𑌼ெ𑌼 எர்க𑌼ொட𑌼மா, இத𑌼ெ𑌼 எ𑌼த𑌼்த𑌼னி யங்க𑌼ெ𑌼 எ𑌼ட𑌼ட𑌼ாளு ஒன் ஜாக்க பொக𑌼ெ𑌼ல் உன்ட𑌼ி எ𑌼ன்ட𑌼ெ𑌼த𑌼ெ𑌼. அன் முண்ட𑌼ெ𑌼க𑌼ெ𑌼ர்சி அத𑌼ெ𑌼 ஏ𑌼ள்ளிலமா, அத𑌼ெ𑌼 ஏ𑌼ள்க𑌼ுனு நங்க𑌼ெ𑌼 ப𑌼ார்கி எ𑌼ன்ட𑌼ெ𑌼த𑌼ெ𑌼. நங்க𑌼ெ𑌼 போக𑌼 ப𑌼ா எ𑌼ன்ட𑌼ெ𑌼த𑌼ெ𑌼. பின நாராய்ன் மக𑌼ெ𑌼லெ𑌼 பே𑌼செ𑌼த𑌼ெ𑌼. பெ𑌼ய்ட்டு நீர் ப𑌼ாவெ𑌼ல் அக𑌼ெ𑌼 எ𑌼ட𑌼்ட𑌼ாளு நோட𑌼்செ𑌼க𑌼ெ𑌼. அன் நாராய்ன் மக𑌼ெ𑌼லெ𑌼 நல்லாக்கெ𑌼ன் இத𑌼்த𑌼ெ𑌼. கோட் முண்ட𑌼ெ𑌼க𑌼ெ𑌼ர்சி கொக்கிர் பல்தங்க𑌼ி இத𑌼்த𑌼ெ𑌼. அன் முண்ட𑌼ெ𑌼க𑌼ெ𑌼ர்சி நாராய்ன் மக𑌼ெ𑌼லொட𑌼 நிய்யெ𑌼 உட்னிப்பெ𑌼 குப்பயா கல்செ𑌼னு யன்க்க தரே, யன் குப்பய நிய்யெ𑌼 உட்டாக𑌼ே எ𑌼ன்ட𑌼ெ𑌼த𑌼ெ𑌼. அன் நாராய்ன் மக𑌼ெ𑌼லெ𑌼 தன் குப்பய கல்செ𑌼னு கொட்டெ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சி நாராய்ன் மக𑌼ெ𑌼லெ𑌼 குப்பயா உட்டெ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சி குப்பயா நாராய்ன் மக𑌼ெ𑌼லெ𑌼 உட்டெ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சி நாராய்ன் மக𑌼ெ𑌼லொட𑌼 நிய்யெ𑌼 நீர் ப𑌼ாவெ𑌼ல் நோட𑌼ொ எ𑌼ன்ட𑌼ெ𑌼த𑌼ெ𑌼. அன் நாராய்ன் மக𑌼ெ𑌼லெ𑌼 ப𑌼ாவெ𑌼ல் நோட𑌼்செத𑌼ெ𑌼. அன் முண்ட𑌼ெ𑌼க𑌼ெ𑌼ர்சி நாராய்ன் மக𑌼ெ𑌼லிய நீர் ப𑌼ாவெ𑌼ல் தய்லுட்ன் கத𑌼்த𑌼ெ𑌼. பின முண்ட𑌼ெ𑌼க𑌼ெ𑌼ர்சி ஆல் ம்யட்தெ𑌼ஙா பெ𑌼ய்ட்டு ஆ உட𑌼்க𑌼ெ𑌼ன் மண்ல் ப்யானெ𑌼 நே𑌼ய்ரித𑌼்த𑌼ெ𑌼 கோட் முண்ட𑌼ெ𑌼க𑌼ெ𑌼ர்சி. பின ஆ உட𑌼்க𑌼ெ𑌼ன் கண் தர்த𑌼ுட்ன் நே𑌼ய்ராட்டு நவெ𑌼 குய்ட்னு ப𑌼ன்ட𑌼ெ𑌼 ப𑌼ே𑌼ரிரி உட𑌼்க𑌼ித்தியமா, இன ஈங்க𑌼ுத𑌼ெ𑌼 கூட்னட𑌼மா அன்பெ𑌼னு ந்யன்தாட்டு. பின ஈன குய்ட்னு போக𑌼 எ𑌼ன்ட𑌼ாட்டு குய்ட்னு தங் கீர்க்க பே𑌼செ𑌼த𑌼ெ𑌼. பினஆ உட𑌼்க𑌼ெ𑌼ன் தனப𑌼்ப𑌼ி நாட𑌼ோட்டய யன் மங்ஙெ𑌼னு நாராய்ன் மக𑌼ெ𑌼லிய பெ𑌼ணாக்கெ𑌼ன் குய்ட்னு ப𑌼ன்னட𑌼மா எ𑌼ன்ட𑌼ெ𑌼த𑌼ெ𑌼. பின ஆண நோட𑌼்லய அல்லிப்பெ𑌼 மன்செ𑌼ன்ட𑌼ெ𑌼 ஒட்டயாளு அல்க்க ப𑌼ன்ட𑌼ெ𑌼க𑌼ெ𑌼. பின ப𑌼ாட்டு ஆ மன்செ𑌼ன்ட𑌼ெ𑌼 ஆண நோட𑌼்செ𑌼க𑌼ெ𑌼. மன்செ𑌼ன்ட𑌼ெ𑌼 நே𑌼ய்ராட்டு ஆங்க𑌼ாசனி இப் பெ𑌼ணாக்கெ𑌼ன ஓட𑌼ெ𑌼க்க பே𑌼லொ எ𑌼ன்ட𑌼ெ𑌼க𑌼ெ. அன் ஆ உட𑌼்க𑌼ித்தி ஓட𑌼்செ𑌼ஙா காலெ𑌼 சாட𑌼ங்க𑌼ி ஆசெ𑌼த𑌼ெ𑌼. பின நக𑌼்க𑌼ெ𑌼க்க பே𑌼லொ எ𑌼ணெ𑌼ஙா, பின அத𑌼ெ𑌼 நக்க𑌼ெ𑌼செ𑌼ஙா அன் பல்லெ𑌼 கொக்கிரி கொக்கிரி ஆசெ𑌼த𑌼ெ𑌼. பின ஆ மன்செ𑌼ன்ட𑌼ெ𑌼 ஒட்டயாளு இத𑌼ெ𑌼 கோட்ல் இப்பெ𑌼 முண்ட𑌼ெ𑌼க𑌼ெ𑌼ர்சிமி எ𑌼ன்ட𑌼ாட்டு அக𑌼ெ𑌼 ஒட்டயாளு எ𑌼ட்ன்காட்டு பே𑌼செ𑌼க𑌼ெ𑌼. பின முண்ட𑌼ெக𑌼ெ𑌼ர்சி ஒன்டெ𑌼 ஆ உட𑌼்க𑌼்க𑌼ித்திய தய்லூன் கத𑌼ெ𑌼 நீர் ப𑌼ாவெ𑌼க்க எப𑌼ெ𑌼னு பே𑌼செ𑌼த𑌼ெ𑌼. பெ𑌼ய்ட்டு நீர் ப𑌼ாவெ𑌼ல் நோட𑌼்ன் ஆ உட𑌼்க𑌼ித்தி தாமரெ𑌼 பூக𑌼ெ𑌼 ஐனித்த𑌼ெ𑌼. பின ஆண நே𑌼ய்ராட்டு பெ𑌼ய்ட்டு ஆ முண்ட𑌼ெ𑌼க𑌼ெ𑌼ர்சி நும்ப𑌼ெ𑌼லெ𑌼 ஆசெ𑌼த𑌼ெ𑌼. பின தன் க𑌼ெ𑌼னுமக𑌼்க𑌼ி நாட𑌼ொட்டய பெ𑌼ய்ட்டு ப𑌼ாட்டு தன் பெ𑌼ண்ட𑌼ொட𑌼 யன்க்க நிச்செ𑌼 கெத்துட𑌼ே எ𑌼ன்ட𑌼ெ𑌼த𑌼ெ𑌼. அன் முண்ட𑌼ெ𑌼க𑌼ெ𑌼ர்சி நிய்யெ𑌼 நிச்சானு கெதுட𑌼ுக்க பெ𑌼த𑌼ொட𑌼ியிமி. யன் பாட𑌼ெ𑌼 யன்க்கமா எ𑌼ன்ட𑌼ெ𑌼த𑌼ெ𑌼. ஆங் பெ𑌼த𑌼ெ𑌼ஙா நின்க்க ஐன்ட𑌼ி ஆசெ𑌼த𑌼ெ𑌼 அன்பெ𑌼னு தன் க𑌼ெனுமக𑌼்க𑌼ி கே𑌼ட்டெ𑌼த𑌼ெ𑌼. அன் முண்ட𑌼ெ𑌼க𑌼ெ𑌼ர்சி யன்க்க நும்ப𑌼ெலுமு ஆய்னட𑌼்த𑌼ெ𑌼, நிய்யெ𑌼 கொள ப𑌼ாவெ𑌼ல் பெ𑌼ய்ட்டு அல்லி இப்பெ𑌼 தாமரெ𑌼 பூக𑌼ெ𑌼 ப𑌼ேரெ𑌼 எ𑌼ட்னு ப𑌼ாட்டு ஆப𑌼ேரிய தக்தெ𑌼னு யன் நெட்ல் உத𑌼்த𑌼ெ𑌼சானி யன் நும்ப𑌼ெ𑌼லெ𑌼 சிரப்பமா எ𑌼ன்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ன் பின்பெ𑌼 நாளெ𑌼 ஆ ஜாக்க பூக𑌼ெ𑌼 பட𑌼்லாயெ𑌼 பே𑌼செ𑌼ஙா அத𑌼ெ𑌼 பூக𑌼ெ𑌼அட்னிரி இட்னிரி நெக𑌼்க𑌼ெ𑌼செ𑌼த𑌼ெ𑌼. பின ஆங் மாய்ட𑌼்னு ஆ ப𑌼ேரிய பட𑌼்செ𑌼த𑌼ெ𑌼. பின ஆண எ𑌼ட்னு பெ𑌼ய்ட்டு யர்த்தெ𑌼னு முண்ட𑌼ெ𑌼க𑌼ெ𑌼ர்சிக்க உத𑌼்செ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சிக்க நும்ப𑌼ெ𑌼லெ𑌼 சிராசெ𑌼த𑌼ெ𑌼. பின தாமரெ𑌼 பூக𑌼ெ𑌼 தெ𑌼ப்பிய எ𑌼ட்னு எர்ஜத𑌼ெ𑌼ஙா அத𑌼ெ𑌼 மாங்க𑌼ாய் ம்யரி ஆசெ𑌼த𑌼ெ𑌼. பின அல்லி ஒன் மாங்க𑌼ாயெ𑌼 ஆசெ𑌼த𑌼ெ𑌼. பின ஆன நே𑌼ய்ராட்டு முண்ட𑌼ெ𑌼க𑌼ெ𑌼ர்சி நும்ப𑌼ெ𑌼லெ𑌼 ஆசெ𑌼த𑌼ெ𑌼. அன் தன் க𑌼ெ𑌼னுமக𑌼்க𑌼ொட𑌼 ஆ மங்க𑌼ாய் ம்யரிய தர்சானு எ𑌼ட்ன் ப𑌼ாட்டு உத𑌼்த𑌼ெ𑌼சானி யன் நும்ப𑌼ெ𑌼லெ𑌼 சிராப்மா ஆன்பெ𑌼னு ப𑌼ுத𑌼்த𑌼ெ𑌼. பின தன் க𑌼ெ𑌼னுமக𑌼்க𑌼ி பெ𑌼ய்ட்டு மாங்க𑌼ாய் ம்யரிய தர்சாத𑌼ெ𑌼ஙா ஆ மாங்க𑌼ாயெ𑌼 பார்ச்செ𑌼த𑌼ெ𑌼. பின அல்லி ஒன் மக𑌼்க𑌼ி எச்சித்த𑌼ெ𑌼. அன் மாங்க𑌼ாயெ𑌼 ஆ மக𑌼்க𑌼ி எ𑌼ச்சித𑌼ெ𑌼 ஜாக்க பே𑌼செ𑌼த𑌼ெ𑌼. அன் மக𑌼்க𑌼ி மாங்க𑌼ாய நோட்செ𑌼த𑌼ெ. நவெ𑌼 ஆ மாங்க𑌼ாயெ𑌼 திம்ப𑌼ிய எ𑌼ன்ட𑌼ாட்டு சாக்கெ𑌼 எ𑌼ர்த்தெ𑌼த𑌼ெ𑌼. அன் மாங்க𑌼ாயெ𑌼 ஆ மக𑌼்க𑌼ொட𑌼 சிசி யனிய தார்செ𑌼னு தின்ட𑌼ாட்டு எ𑌼ன்ட𑌼ெ𑌼த𑌼ெ𑌼. அன் ஆ மக𑌼்க𑌼ி மாங்க𑌼ாயெ𑌼 ப𑌼ெல்கிஜெ𑌼ன நே𑌼ய்ராட்டு பே𑌼ர்செ𑌼செ𑌼த𑌼ெ𑌼. பின ஆ மாங்க𑌼ாய எ𑌼ட்னு தன் அஜ்ஜி ப𑌼ார்க𑌼்க𑌼ுனு ஓத𑌼ெ𑌼ர்செ𑌼னு எ𑌼ட்செ𑌼னித𑌼்த𑌼ெ𑌼. பின அஜ்ஜி ப𑌼ன்ட𑌼ெ𑌼த𑌼ெ𑌼. ப𑌼னெ𑌼ஙா ஆ மக𑌼்க𑌼ி தனஜ்ஜோட𑌼 பெ𑌼த𑌼்த𑌼ெ𑌼. ஈங்கிமி நவெ𑌼 எச்சித𑌼ெ𑌼ஙா ஒன் மாங்க𑌼ாயெ𑌼 ப𑌼னமா, பின அத𑌼ெ𑌼 யணோட𑌼 ப𑌼ெல்கிஜமா எ𑌼ன்ட𑌼ெ𑌼த𑌼ெ𑌼. ஆங் புத𑌼ெ𑌼ஙா அஜ்ஜி மாங்க𑌼ாயெ𑌼 ப𑌼ெல் கீவெ𑌼த𑌼ெ𑌼 அன்பெ𑌼னு கே𑌼ட்டெ𑌼த𑌼ெ𑌼. அன் மக𑌼்க𑌼ி ப𑌼ெல்கிஜாம எ𑌼ன்ட𑌼ெ𑌼த𑌼ெ𑌼. பின அஜ்ஜி மாங்க𑌼ாய நோட𑌼்செ𑌼த𑌼ெ𑌼. அஜ்ஜிமாங்க𑌼ாய நே𑌼ய்ராட்டு மாங்க𑌼ாய கெ𑌼ஜூரிய எ𑌼ன்ட𑌼ாட்டு சாக்கெ𑌼 எ𑌼ட்னு கெ𑌼ஜூட்ல் பே𑌼செ𑌼ஙா, அன் மாங்க𑌼ாயெ𑌼 சிசி யனிய தர்சாட்டு எ𑌼ன்ட𑌼ெ𑌼த𑌼ெ𑌼. அன் அஜ்ஜி ஆ மாங்க𑌼ாய தர்செ𑌼லா. பின மாங்க𑌼ாயெ𑌼 அதெ𑌼ரொட𑌼 யனிய ஒன் கீர்ல் சாணி உட்னெ𑌼 மெக்குனு ஆ கீர்ல் எ𑌼ட்னு பெ𑌼ய்ட்டு யனிய ப𑌼ுட்டக𑌼ோ எ𑌼ன்ட𑌼ெ𑌼த𑌼ெ𑌼. பின அக𑌼ெ𑌼 ஆங் கிஜட்டு ஆ மாங்க𑌼ாயெ𑌼 எ𑌼ட்னு பெ𑌼ய்ட்டு ப𑌼ுட்டெ𑌼க𑌼ெ𑌼. பின பின்பெ𑌼 நாளெ𑌼 எ𑌼ர்க𑌼ித𑌼ெ𑌼ஙா நோட𑌼்ன் ஆ மாங்க𑌼ாயெ𑌼 உட𑌼்க𑌼ித்தி ஐய்னித𑌼்த𑌼ெ𑌼. அத𑌼ெ𑌼ர் கீரி த𑌼ப்பெ𑌼 கீரி ஐய்னித𑌼்த𑌼ெ𑌼. பின ஆ கீர்ல் இத𑌼ெ𑌼 ஆ மக𑌼்க𑌼ி த𑌼ப்பெ𑌼 உட𑌼்க𑌼ெ𑌼ன் ஆசெ𑌼த𑌼ெ𑌼. பின ஆ நாராய்ன் மக𑌼ெ𑌼லெ𑌼 ஆ உட𑌼்க𑌼ெ𑌼ன் எ𑌼ட𑌼்ட𑌼ாளு மத𑌼ு மாட𑌼்செ𑌼க𑌼ெ𑌼. பின நாராய்ன் மக𑌼ெ𑌼லெ𑌼 ஒன்டெ𑌼 நீராய்ட𑌼்னு மாட𑌼ி உக்க தன் தாக்கெ𑌼ரிய ஐன்கினித𑌼்த𑌼ெ𑌼. ஐன்கினித𑌼ெ𑌼ஙா ஆ முண்ட𑌼ெ𑌼க𑌼ெ𑌼ர்சி அலிய பே𑌼ய்னித𑌼்த𑌼ெ𑌼. பின முண்ட𑌼ெ𑌼க𑌼ெ𑌼ர்சி ஆ உட𑌼்க𑌼ித்திய நே𑌼ய்ராட்டு அன்ட𑌼ெ𑌼 நும்ப𑌼ெ𑌼லெ𑌼 ஆசெ𑌼த𑌼ெ𑌼. பின தன் க𑌼ெ𑌼ன்ட𑌼ாலெ𑌼 இன்ட𑌼ெ𑌼 நின்க்க ஐன்ட𑌼ி ஆசெ𑌼த𑌼ெ𑌼 எ𑌼ணெ𑌼ஙா, அன் முண்ட𑌼ெ𑌼க𑌼ெ𑌼ர்சி நவெ𑌼 அட்டாலிய பே𑌼ய்னித𑌼னி அன் ஒன் சிராய மண்தாக்கெ𑌼ரெ𑌼 இப்பெ𑌼 உட𑌼்க𑌼ித்திய நோட𑌼்னனி ஆண நோட𑌼்செ𑌼ஙா யன்க்க நும்ப𑌼ெ𑌼லெ𑌼 ஆசி எ𑌼ன்ட𑌼ெ𑌼த𑌼ெ𑌼. பின யன்க்க ஈ நும்ப𑌼ெ𑌼லெ𑌼 சிராக்க ஆ உட𑌼்க𑌼ித்திய கென்க𑌼ாட்டு, உட𑌼்க𑌼ித்தி கிய்ய தர்செ𑌼னு ஆண் நெ𑌼த்தெ𑌼ரிய எ𑌼ட்ன்ப𑌼ாட்டு உத𑌼்த𑌼ெ𑌼சானி யன் நும்ப𑌼ெ𑌼லெ𑌼 சிராப்மா எ𑌼ன்ட𑌼ெ𑌼த𑌼ெ𑌼 முண்ட𑌼ெ𑌼க𑌼ெ𑌼ர்சி. பின ஆ மன்செ𑌼ன் நிய்யெ𑌼 பெ𑌼த𑌼ெ𑌼ன ஒட்டய நவெ𑌼 கிஜனி. இன நவெ𑌼 எட்டாங்க𑌼ி ஆ உட𑌼்க𑌼ித்திய கென்க𑌼ானு நவெ𑌼 எட்டாங்க𑌼ி நெ𑌼த்தெ𑌼ரெ𑌼 எ𑌼ட்னு ப𑌼ுப்பெ𑌼க𑌼ெ𑌼 அன்பெ𑌼னு கே𑌼ட்டெ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சி யன்க்க அத𑌼ெ𑌼 ஒட்டய க𑌼ொதிலமா யன்க்க நும்ப𑌼ெ𑌼லெ𑌼 சிராய்த𑌼ப்பெ𑌼லமா எ𑌼ணாணி ஆண எ𑌼ட்ன் ப𑌼ான்ட𑌼பெ𑌼லமா எ𑌼ன்ட𑌼ெ𑌼த𑌼ெ𑌼. பின உட𑌼்க𑌼ெ𑌼ன் யாரெஜெ𑌼னு நட𑌼்த𑌼ொட்டெ𑌼த𑌼ெ𑌼. பின பினொன்டெ𑌼 ஆ உட𑌼்க𑌼ெ𑌼ன் ஆ உட𑌼்க𑌼ித்தி நெ𑌼த்தெ𑌼ரெ𑌼 எட்ன் ப𑌼ாட𑌼்லாயெ𑌼 பே𑌼செ𑌼த𑌼ெ𑌼. பின ஆ உட𑌼்க𑌼ித்தி ஈ உட𑌼்க𑌼ெ𑌼ன நே𑌼ய்ராட்டு க𑌼ொத𑌼்மாட𑌼்செ𑌼த𑌼ெ𑌼. பின உட𑌼்க𑌼ித்தி ஆ உட𑌼்க𑌼ெ𑌼னொட𑌼 கே𑌼ட்டெ𑌼த𑌼ெ𑌼, நெ𑌼ன்டெ𑌼 நின் பெ𑌼ண்ட𑌼ெ𑌼 இலிய ப𑌼னமா , இன்ட𑌼ெ𑌼 நிய்யெ𑌼 இலிய ப𑌼ன்னாடியி எ𑌼ன்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ன் ஒட்டய காய்ரிய உட𑌼்க𑌼ித்தொட𑌼 பெ𑌼த𑌼்த𑌼ெ𑌼. பின உட𑌼்க𑌼ித்தி நிய்யெ𑌼 யனிய கென்க𑌼ாலயெ𑌼 பட்டானி, அன் ஈப்பி இல்படெ𑌼 ஜாக𑌼ெ𑌼ல் எ𑌼ட்னு பெ𑌼ய்ட்டு கெ𑌼ன்க𑌼ாக𑌼ே எ𑌼ன்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ன் உட𑌼்க𑌼ித்தி எ𑌼ட𑌼்ட𑌼ாளு ஒன் நல் ஜாக்க பே𑌼செ𑌼க𑌼ெ𑌼. பின ஆ உட𑌼்க𑌼ெ𑌼ன் ஆ உட𑌼்க𑌼ித்திய கென்க𑌼த𑌼்த𑌼ெ𑌼. பின ஆ நெ𑌼த்திரிய எ𑌼ட்னு பெ𑌼ய்ட்டு ஆ முண்ட𑌼ெ𑌼க𑌼ெ𑌼ர்சிக்க உத𑌼்த𑌼ெ𑌼செ𑌼த𑌼ெ𑌼. பின அத𑌼ெ𑌼ஙா நும்ப𑌼ெ𑌼லெ𑌼 சிராசெ𑌼த𑌼ெ𑌼. பின ஆ உட𑌼்க𑌼ெ𑌼ன் என்ட𑌼ெ𑌼 யாரெஜெ𑌼னு ஆ ஜாக்க தன்ன பெ𑌼ய்யொட்டெ𑌼த𑌼ெ𑌼. பின பின்பெ𑌼 நாளெ𑌼 பெ𑌼ய்ட்டு ஆ உட𑌼்க𑌼ெ𑌼ன் ஆ ஜாக𑌼ெ𑌼ல் நோட𑌼்ன் பலு சாத𑌼னி மொல்தினித𑌼்த𑌼ெ𑌼. பின அ ஜாக்க என்ட𑌼ெ𑌼 எ𑌼ட𑌼் கே𑌼ள்ட𑌼ெ𑌼 பன்ட𑌼ொட்டெ𑌼க𑌼ெ𑌼. பின ஆ கே𑌼ள்ன்ட𑌼ெ𑌼 அக்கா ஈங்க𑌼ி ஒன் பாமி நட𑌼்த𑌼மா எ𑌼ன்ட𑌼ாட்டு பெ𑌼த𑌼்த𑌼ீட்டு இன கேக்ஙா பே𑌼ல்கி எ𑌼ன்ட𑌼ாட்டு எ𑌼ட்ன்காட்டு பெரே𑌼செ𑌼க𑌼ெ𑌼. பின ஆ உட𑌼்கெ𑌼ன் அக𑌼ெ𑌼 பெ𑌼வெ𑌼ன கே𑌼ட்டாட்டு, பின ஆ உட𑌼்க்கெ𑌼ன் கேக்ஙா பெ𑌼ய்ட்டு அக𑌼ெ𑌼 பே𑌼வெ𑌼 பாமிய கே𑌼ட்டெத𑌼ப்பெ𑌼லமா எ𑌼ன்ட𑌼ாட்டு, பின பின்பெ𑌼 நாளெ𑌼 ஆ ஜாக்க பே𑌼செ𑌼த𑌼ெ𑌼. பின கே𑌼ள்ன்ட𑌼ெ𑌼 ஆ பாமிய உத𑌼்த𑌼ாய பெ𑌼த𑌼ெ𑌼க𑌼ெ𑌼. ஈங்கிமி ஆ நாராய்ன் மக𑌼ெ𑌼லிய முண்ட𑌼ெ𑌼க𑌼ெ𑌼ர்சி கொன்ட𑌼ாட𑌼ெ𑌼செ𑌼த𑌼ெ𑌼. ஆ முண்ட𑌼ெ𑌼க𑌼ெ𑌼ர்சி ஆங் மய்ராட்டு ஆ உட𑌼்க𑌼ெ𑌼னிப்பெ𑌼லி இன முண்ட𑌼ெ𑌼க𑌼ெ𑌼ர்சி கிராய்னு கூட்னட𑌼மா எ𑌼ன்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ஙா ஒட்டய க𑌼ொத்தாசெ𑌼த𑌼ெ𑌼. பின முண்ட𑌼ெ𑌼க𑌼ெ𑌼ர்சொட𑌼 ஆ உட𑌼்க𑌼ெ𑌼ன் ஈங் பெ𑌼த𑌼்த𑌼ெ𑌼, இன்ட𑌼ெ𑌼 த𑌼ார் நெ𑌼த்தெ𑌼ரெ𑌼 எ𑌼ட்ன் ப𑌼ுப்பெ𑌼க𑌼ெ𑌼 எ𑌼ன்ட𑌼ெ𑌼த𑌼ெ𑌼. அன் முண்ட𑌼ெ𑌼க𑌼ெ𑌼ர்சி இன்ட𑌼ெ𑌼 நவெ𑌼 எ𑌼ட𑌼் கே𑌼ள்ன்ட𑌼ெ𑌼ட𑌼்ன கணாணி, அத𑌼ெ𑌼ட𑌼்ன கென்க𑌼ாட்டு எ𑌼ட்னோட𑌼ெ என்ட𑌼ெ𑌼த𑌼ெ𑌼. அன் உட𑌼்கெ𑌼ன் கென்க𑌼ாலயெ𑌼 ஊத𑌼ெ𑌼 அத𑌼ெ𑌼ட𑌼்ன அளமா. நினியமா நினிய கென்க𑌼த𑌼்த𑌼ாப்பெ𑌼லமா, எ𑌼ன்ட𑌼ாட்டு ஆ முண்ட𑌼ெ𑌼க𑌼ெ𑌼ர்சிய ஆ உட𑌼்க𑌼ெ𑌼ன் கென்க𑌼ாத𑌼்த𑌼ெ𑌼. கென்க𑌼ாட்டு ஒன் பந்த𑌼ெ𑌼லெ𑌼 உட்டாட்டு ஆ முண்ட𑌼ெ𑌼க𑌼ெ𑌼ர்சிய ஆ பந்த𑌼ெ𑌼ல்தெ𑌼ல் எ𑌼ட𑌼் கூர் மய்ராட்டு கய்ட்ன்கானித𑌼்த𑌼ெ𑌼. பின நாராய்ன் மக𑌼ெ𑌼லெ𑌼 பின உட்டாய்னு த𑌼ப்பெ𑌼 உட𑌼்க𑌼ித்தி ஆசெ𑌼த𑌼ெ𑌼. பின ஆ உட𑌼்க𑌼ெ𑌼ன் நாராய்ன் மக𑌼ெ𑌼லெ𑌼 எ𑌼ட𑌼்ட𑌼ாளு மத𑌼ு மாட𑌼்செ𑌼க𑌼ெ𑌼. பின ஆ உட𑌼்க𑌼ெ𑌼ன் நாராய்ன் மக𑌼ெ𑌼லிய குய்ட்னு பின தங் கீர்க்க ப𑌼ன்ட𑌼ெ𑌼த𑌼ெ𑌼. பின ஆ உட𑌼்க𑌼ெ𑌼ன் தனப𑌼்ப𑌼ி செத்தெ𑌼னே𑌼னித𑌼்த𑌼ெ𑌼. பின அல்லி இப்பெ𑌼 மன்செ𑌼ன்ட𑌼ெ𑌼 ஒட்டயாளு ஆ உட𑌼்க𑌼ெ𑌼ன் கீர்க்க ப𑌼ன்ட𑌼ெ𑌼க𑌼ெ𑌼. பின ஆ உட𑌼்க𑌼ித்திய ஓட𑌼ெ𑌼க்க பெ𑌼த𑌼ெ𑌼க𑌼ெ𑌼. பின உட𑌼்க𑌼ித்தி ஒட𑌼்செ𑌼ஙா ப𑌼ெ𑌼ய்ல் க𑌼ுண்ட𑌼ெ𑌼 ப𑌼ுத𑌼்த𑌼ெ𑌼த𑌼ெ𑌼. பின நக்க𑌼ெ𑌼க்க பெ𑌼த𑌼ெ𑌼க𑌼ெ𑌼. பின நக்க𑌼ெ𑌼செ𑌼ஙா பொண் க𑌼ுண்ட𑌼ெ𑌼 புத𑌼்த𑌼ெ𑌼த𑌼ெ𑌼. பின அக𑌼ெ𑌼 ஒட்டயாளு இத𑌼ெ𑌼மு நாராய்ன் மக𑌼ெ𑌼லெ𑌼 எ𑌼ன்ட𑌼ாட்டு பே𑌼செ𑌼க𑌼ெ𑌼. பின முண்ட𑌼ெ𑌼க𑌼ெ𑌼ர்சி தனப𑌼்ப𑌼ி தனமெ𑌼ன் எ𑌼ட𑌼்ட𑌼ாளு ப𑌼ாட்டு முண்ட𑌼ெ𑌼க𑌼ெ𑌼ர்சிய கே𑌼ட்டெ𑌼க𑌼ெ𑌼. அன் உட𑌼்க𑌼ெ𑌼ன் அட்டாந்த𑌼ெ𑌼 நிங் மக𑌼ெ𑌼லெ𑌼 கென்க𑌼ானு எட்ன் காணணி ஆண எ𑌼ட்னு பீக𑌼ோ எ𑌼ன்ட𑌼ெ𑌼த𑌼ெ𑌼. பின அக𑌼ெ𑌼 அத்தெ𑌼னு முண்ட𑌼ெ𑌼க𑌼ெ𑌼ர்சி சாவிய எ𑌼ட்னு பே𑌼செ𑌼க𑌼ெ𑌼. பின நாராய்ன் மக𑌼ெ𑌼லெ𑌼 உட𑌼்க𑌼ெ𑌼ன் எ𑌼ட𑌼்ட𑌼ாளு நல்லய இத𑌼ெ𑌼க𑌼ெ𑌼.
