ஒன்ட𑌼ெ𑌼 ஈட𑌼்ல் ஆறு ஆண் கெ𑌼ரெ𑌼ண்ட𑌼ெ𑌼 இத𑌼ெ𑌼க𑌼ெ𑌼. அத𑌼ெ𑌼ர்க்க ஒன் கெ𑌼ராளெ𑌼 இத𑌼்த𑌼ெ𑌼. தன் அண்ன்ட𑌼ெ𑌼 எ𑌼ர்க𑌼ித𑌼ெ𑌼ஙா பெ𑌼ய்னியெ𑌼 கீல்லுஙா ப𑌼ெ𑌼ரி கத𑌼்க்க போப்பெ𑌼க𑌼ெ𑌼. பின கெ𑌼ராளெ𑌼 அதெ𑌼ர்க்க நிச்செ𑌼 அட்னு எ𑌼ட்னு போப்பெ𑌼த𑌼ெ𑌼. அத𑌼ெ𑌼 போப்பெ𑌼 ப𑌼ட்ல் பிலியெ𑌼 ஒன்ட𑌼ெ𑌼 இப்பெ𑌼த𑌼ெ𑌼. பிலியெ𑌼 உட𑌼்க𑌼ித்தொட𑌼 யன்க்க நிச்செ𑌼 எ𑌼ட்னு ப𑌼ன்ளலி அன்பெ𑌼னு கே𑌼ட்டெ𑌼த𑌼ெ𑌼. அன் உட𑌼்க𑌼ித்தி பெ𑌼த𑌼்த𑌼ெ𑌼 நின்க்க நவெ𑌼 நிச்செ𑌼 அட்னு எ𑌼ட்னு ப𑌼ன்லனி,கேக்ஙா ப𑌼ுப்பெ𑌼ன் நின்க்க சேர்ச்செ𑌼னு நிச்செ𑌼 எ𑌼ட்னு ப𑌼ுப்பெ𑌼னி அன்பெ𑌼னு பிலியொட𑌼 உட𑌼்க𑌼ித்தி பெ𑌼த𑌼்த𑌼ெ𑌼. அல்க்க பிலியெ𑌼 , சிரிமி அன்பெ𑌼னு பெ𑌼தாட்டு நிய்யெ𑌼 பீக𑌼ே அன்பெ𑌼னு பெ𑌼த𑌼்த𑌼ெ𑌼.

ஒன்ட𑌼ெ ஈட𑌼்ல் அசெ𑌼 க𑌼ரெ𑌼வெ𑌼 (எ𑌼த்தெ𑌼) இத்த𑌼ெ𑌼. ஆ எ𑌼த்தெ𑌼 ஒன் பெ𑌼ய்ர்க𑌼ாட்ல் மேஜித𑌼்த𑌼ெ𑌼. அப் பெ𑌼ய்ர்க𑌼ாட்ல் ஒன் பிலியெ𑌼 ஒன்ட𑌼ெ𑌼 இத𑌼்த𑌼ெ𑌼. பிலியெ𑌼 எ𑌼த்திய நே𑌼ய்ராட்டு ஐட்னு பே𑌼செ𑌼த𑌼ெ𑌼. அன் எ𑌼த்தெ𑌼 பிலியோட𑌼 யன்க்க ஒன்ட𑌼ெ𑌼 எ𑌼த் மெரியெ𑌼 உன்ட𑌼ி, நவெ𑌼 பெ𑌼ய்ட்டு யன் எ𑌼த் மெரிக்க பாலெ𑌼 கொட்டாட்டு ப𑌼ுப்பியா பின நிய்யெ𑌼 யனிய அன் அர்த𑌼ெ𑌼னு தின்ட𑌼ாக𑌼ே அன்பெ𑌼னு பெ𑌼த𑌼்த𑌼ெ𑌼. பிலியெ𑌼 சிரிமி எ𑌼ன்ட𑌼ெ𑌼த𑌼ெ𑌼. பின எ𑌼த்தெ𑌼 தன் கீர்க்க பெ𑌼ய்ட்டு தன் மெரிக்க பால் கொட்டாட்டு நர்த𑌼ெ𑌼னு பெ𑌼ய்ர்க𑌼ாட்ல் ப𑌼ட்ல்லா ப𑌼ன்ட𑌼ெ𑌼த𑌼ெ𑌼. பின பிலியெ𑌼 எ𑌼த்திய கண்ட𑌼ாட்டு அட்டெ𑌼செ𑌼த𑌼ெ𑌼.

<ஒன்ட𑌼ெ𑌼 ஈட𑌼்ல் கினிரி பென்ட𑌼ி எ𑌼ட𑌼்ட𑌼ாளு இத𑌼ெ𑌼க𑌼ெ𑌼. பின அக𑌼ெ𑌼ட𑌼்ட𑌼ாளு ஒன் ஜாக𑌼ெ𑌼ல் கத𑌼்த𑌼ெ𑌼ல் பெ𑌼ய்னிக்க பே𑌼செ𑌼க𑌼ெ𑌼. பின அல்லி பென்ட𑌼ி நல்லய பெ𑌼னிய கீவெ𑌼த𑌼ெ𑌼. கினிரி பெ𑌼ய்னியெ𑌼 கீல்த𑌼ி ஏரய்ரி இப்பெ𑌼த𑌼ெ𑌼. பென்ட𑌼ி சூட𑌼ெ𑌼 எ𑌼த𑌼்த𑌼ெ𑌼னு பெ𑌼ய்னியெ𑌼 கிஜொட்டெ𑌼த𑌼ெ𑌼. கினிரி பய்ய ப𑌼ாட்னு முள்காயெ𑌼 தின்ட𑌼ி ப𑌼ாட்னிப்பெ𑌼த𑌼ெ𑌼. நல்லய பெ𑌼ய்னியெ𑌼 கீவெ𑌼த𑌼ெ𑌼 ப𑌼ாட்டு பென்ட𑌼ி. பின மத𑌼ன்க்க நிச் தின்லாயெ𑌼 போப்பெ𑌼ன் பென்ட𑌼ி கிய்யெ𑌼 காலெ𑌼 கெத்தாட்டு போப்பெ𑌼த𑌼ெ𑌼. பின கினிரி பெ𑌼ய்னியெ𑌼 கீல்த𑌼்த𑌼ி ஈட்டு நிச்செ𑌼 தின்லாயெ𑌼 போப்பெ𑌼ன் மண்ணெ𑌼 மெத்தெ𑌼னு போப்பெ𑌼த𑌼ெ𑌼.

ஒன்ட𑌼ெ𑌼 ஆட𑌼ெ𑌼க்க ஒன்ட𑌼ாக்க மக்கெ𑌼 இத𑌼ெ𑌼க𑌼ெ𑌼. ஆட𑌼ெ𑌼 தன் மக்கொட𑌼 நவெ𑌼 ஈங்க𑌼ெ𑌼 ஜாக𑌼ெ𑌼லா பெ𑌼யொட𑌼்த𑌼ெமு அன்பெ𑌼னு பெ𑌼த𑌼்த𑌼ெ𑌼.

ஒன் நீர்ப𑌼ாவெ𑌼ல் எ𑌼ட𑌼் ப𑌼க்கிட்டெ𑌼 இத𑌼்த𑌼ெ𑌼. அல்லி ஒன்ட𑌼ெ𑌼 உட𑌼்க𑌼ித்தி நீரெ𑌼 ப𑌼ெல்சித𑌼்த𑌼ெ𑌼. பின ப𑌼ால்த𑌼ீரி ஒன் கினிரி இத𑌼்த𑌼ெ𑌼. அத𑌼ெ𑌼ஙா ப𑌼ாளா ப𑌼ாய்யர்த𑌼ித𑌼்த𑌼ெ𑌼.

ஒன் க𑌼ுண்ட𑌼ெ𑌼ன் க𑌼ுண்ட𑌼ி எ𑌼ட𑌼்ட𑌼ாளு புட்டாட𑌼ெ𑌼 துட𑌼்லாயெ𑌼 பெ𑌼த𑌼ெ𑌼க𑌼ெ𑌼. பின புட்டாட𑌼ெ𑌼 துட𑌼்லாயெ𑌼 நோட𑌼்ன் யரெ𑌼ங்க𑌼ெ𑌼 இத𑌼ெ𑌼லா. பின யரெ𑌼ங்க𑌼ெ𑌼 இல்கெ𑌼ன்ட𑌼ெ𑌼 யரெ𑌼ங்கா பே𑌼செ𑌼க𑌼ெ𑌼. பின அக𑌼ெ𑌼ட𑌼்ட𑌼ாளு யரெ𑌼ங்க𑌼ெ𑌼 பெர்கித𑌼ெ𑌼க𑌼ெ𑌼.